CEBU - Usa ka gipasanginlang notado nga dealer og mga kinawat nga sakyanan dinhi sa dakbayan sa Sugbu nadakpan sa mga sakop sa Criminal Investigation and Detection Group (CIDG-7) sulod sa display center sa buhatan niini niadtong miaging hapon diha sa Sikatuna Street, barangay Zapatera ning dakbayan.
Ang nadakpan mao si Alma Gonzales, 32, residente sa Tuscania Condominium sa V. Rama barangay Guadalupe tag-iya sa GA Italia Motors nga nahimutang sa Zapatera.
Siya gidakop pinasikad sa warrant of arrest sa kasong estafa nga gi-isyu ni Judge Estela Alma Singco sa RTC Branch 12 nga gipetsahan og Nobiyembre 3.
Si Gonzales nasikop nila ni Chief Insp. Rogarth Campo ug mga kaubanan human usab daghang reklamo sa mga buyers labot na sa modus ni Gonzales kinsa nag-atubang usab og daghang kaso.
Si Sr. Supt. Guillermo Eleazar, Regional Director sa CIDG-7 nagkanayon nga dihang nalutsan og warrant of arrest si Gonzales nasuta usab nila sa Cebu City Prosecutors Office nga sa bulan lang sa Agosto ning tuiga unom ka mga kaso ang giatubang niini nga mga kasong estafa ug swindling.
Usa ka Roberto Donato, taga barangay Lagtang, dakbayan sa Talisay mireklamo batok kang Gonzales human niadtong Agosto 27 ning tuiga, ang iyang Honda CRV nga napalit gikan sa akusado nga nagdala sa XSA-486 gisakmit sa PNP Highway Patrol Group (HPG) human masutang gi-karnap kini gikan sa Cavite.
Hinuon si Gonzales nakagawas lang usab gilayon human makabutang og piyansa niadtong niaging adlaw alang na sa temporaryong kagawasan niini.
Nunot niini si Eleazar nanawagan niadtong mga tawo nga nabiktima sa modus operandi ni Gonzales sa pagpatim-aw sa ilang buhatan aron usab ilang maaksyunan.
Samtang iya usab nga giawhag kadtong mga gustong mopalit og sakyanan nga susihon gyud og maayo diha sa HPG ingon man sa LTO ang mga second hand nga sakyanan nga ilang mapalit aron dili mabiktima.
Si Donato nga nahinabi sa mga tigbalita diha sa buhatan sa CIDG-7 nagkanayon nga nakig-barter siya sa suspek sa iyang duha ka sakyanan aron ilisan og Toyota Innova, apan nasutang may problema sad ang mga dokumentos sa maong sakyanan maong gipahulam siya og laing sakyanan apan nadakpan kini pag-usab sa mga polis tungod kay kinawat gihapon kini.
Hangtud ning pagsulat sa balita wala pa mauli ang iyang duha ka sakyanang gi-barter ug ang iyang gibayad nga P750,000. – BANAT NEWS