Talisay Abattoir "AA" pa gihapon - Capala

CEBU - Gihimakak kagahapon ni Konsehal Aaron Capala, tsirman sa slaughter house ang taho nga nakanselar ang Double “A” standard accreditation sa ihawan sa dakbayan sa      Talisay.

Si Capala mibutyag sa pakighinabi niini sa Banat News kagahapon sa hapon nga nahunong lang og upat ka adlaw ang operasyon sa ihawan sa milabay’ng semana tungod sa pagkaguba sa boiler ug wala silay reserba sa maong ekipo.

Ug sa pagkaayo na sa boiler nabalik dayon ang operasyon sa ihawan apan sugod usab sa milabay’ng semana gipahunong nila ang pagdawat og ihaw sa mga kabaw ug baka tungod kay nakahatag kini og ka hugaw ug kasamok sa ihawan ug gipasidan-an sila niini sa National Meat Inspection Services (NMIS).

Gibutyag usab sa tsirman sa slaughter house nga ang ihawan sa siyudad walay mga kawani nga moihaw og kabaw ug baka, ang mga sakop sa mga meat supplier maoy mo- ihaw sa nahisgutang hayopan nga ilang dalhon diha sa ihawan sa siyudad ug nakahatag usab kini og kasamok diha sa ihawan.

Matud niini nga ang siyudad ang nagkinahanglan og napulo ka tawo nga maoy bansayon sa pagpamaagi sa pag-ihaw sa kabaw ug baka.

Matag adlaw ang siyudad adunay maihaw gikan sa 100 hangtud 200 ka baboy ug ang bayad sa matag kilo sa baboy nga ihawon P2.382 lang.

Si Capala midugang nga higpit nilang gibantayan ang pagdumala sa ihawan tungod kay adunay mga nagbantay usab ngadto kanila kung giunsa sa pagpadagan sa siyudad ang nahisgutang income generating facility.