Citom way vacation

CEBU - Gidid-an nang makabakasyon ang mga sakop sa Cebu City Traffic Operations and Management (Citom) sugod sa buwan sa Disyembre base sa giluwatang memorandum ni Citom executive director Arnel Tancinco.

Partikular nga gidid-an ni Tancinco nga mobakasyon mao ang kapin sa 300 ka mga traffic enforcer nga nadistino sa nagkadaiyang kadalanan sa dakbayan.

“Atong tuyo ana nga dili mahurot ang mga traffic enforcer sa pagbakasyon kay wala na unya'y mo-man sa traffic,” sumala ni Tancinco.

Gitataw hinoon ni Tancinco nga ang nahisgutang memorandum matag tuig na niyang luwatan sa ingon niini nga panahon.

Kini tungod kay naobserbahan sa executive director sa Citom sa nangaging Christmas season nga modaghan ang katawhan sa siyudad.

Kini tungod usab sa mangabot nga mga bakasyonista gikan sa nagkalain-laing dapit ingon man niadtong mobakasyon gikan sa gawas sa nasud.

Sa pikas bahin, nagplano karon si Tancinco nga ipaubos sa self-defense training program ang mga traffic enforcer sa siyudad.

Partikular na niini niadtong nadistino sa kadalanan nga maoy sagad makasugat og panagbangi nga may kalabutan sa pagpatuman sa mga lagda sa trapiko.

Lakip sa gusto ni Tancinco nga ipatudlo ngadto sa mga Citom personnel mao ang pipila ka probisyon sa Rules on Engagement.

Gawas sa self-defense, gusto usab sa executive director sa Citom nga matudloan sa first aid ang mga traffic enforcer.

Ang maong plano suportado usab ni Konsehal Jack Jakosalem, ang chairman sa Committee on Transportation sa City Council ug sakop usab sa Citom board.

Usa ka resulosyon ang gipalabang sa konsehal atol sa sesyon sa City Council kagahapon nga magsuporta sa tinguha ni Tancinco. – BANAT NEWS