CEBU - Nitabang na ang konseho sa dakbayan sa Sugbu pagpaningil sa utang sa Department of Public Works and Highways (DPWH-7) ngadto sa mga traffic enforcer sa siyudad.
Kini pinaagi usab sa resolusyon nga gipalabang ni Konsehal Jack Jakosalem atol sa sesyon sa city council kagahapon.
Mokapin sa 50 ka traffic enforcer sa dakbayan ang nangita na sa ilang overtime pay pagpatunhay sa dagan sa trapiko diha sa Banilad-Talamban area.
Partikular na niini sa mga buwan nga gitrabaho pa ang kontrobersiyal nga Banilad flyover nga bag-o lang usab giinugurahan ug giablihan sa publiko.
Nasayran ni Jakosalem nga mokapin pa sa tunga sa milyon ka pesos ang obligasyon sa DPWH ngadto sa mga traffic enforcer.
Kini gikan niadtong buwan sa Abril hangtud nahuman ang flyover construction niadtong miaging buwan sa Oktobre.
Tungod niini ang konsehal nga sakop usab sa CITOM Board nipalabang og resolusyon sa konseho nga maghangyo sa maong ahensiya nga bayran na ang mga traffic enforcer.
Gusto sa konsehal nga mahatag na ang overtime pay sa mga traffic enforcer niining buwana o sa sayong bahin sunod buwan.
Kini aron dunay dugang magasto ang mga CITOM personnel ug mahimong labaw’ng malipayon ug mabulukon unya ang ilang pagsaulog sa Pasko.
Una nang gibutyag ni CITOM executive director Arnel Tancinco nga duha lang ka buwan nga overtime pay ang nadawat sa iyang mga sakop sukad gitrabaho ang flyover.
Nasayran hinoon ni Tancinco nga ang approved variation order na lang gikan sa DPWH ang gipaabot sa kontraktor alang sa pag-release na sa overtime pay. - Elly Bolonos (BANAT NEWS)