CEBU - Nabalaka karon si Kapitan George Rama sa Basak San Nicolas nga dili na makabalik og tukod sa ilang pinuy-anan ang ubay-ubay nga mga biktima sa sunog diha sa ilang barangay.
Kini tungod kay kadaghanan sa gatusan ka mga fire victim giingong mga squatters ug mitukod sa luna nga gipanag-iya og pribadong mga tawo.
Usa sa mga tag-iya sa luna nga gipuy-an sa mga biktima mao ang amahan ni Konsehal Roberto Cabarrubias nga gikatahong gusto nang mobalik og puyo sa maong dapit.
Gipasalig hinuon ni Rama nga siya motabang paghangyo sa mga land owner apan ang kapitan dili makagarantiya nga makabalik pa ang mga fire victim sa ilang giokupahang luna.
“Motabang ta paghangyo sa mga tag-iya nga ipaagi na lang nila og arrangement ba, mobayad ba og abang o paliton ba lang sa mga mopuyo,” sumala ni Rama.
Sa pikas bahin, gitakda na kagahapong adlawa nga ideklarar sa mga opisyal sa barangay ang dapit nga nasunugan ubos sa state of calamity aron mapagawas gilayon ang pundo sa barangay pagtabang sa mga biktima ilabi na niadtong walay nadala o nahipos atol sa sunog.
Matud ni Rama nga labing minos tag P2 mil ang ihatag nga financial assistance sa barangay ngadto sa matag pamilya nga nasunogan.
Nasayran nga ang Basak San Nicolas dunay gigahin nga tunga sa milyon ka pesos nga calamity fund alang niining tuiga.
Kagahapong adlawa usab gitakdang ipalabang ni Konsehal Gerardo Carillo ang resolusyon sa City Council nga magdiklarar sa dapit nga nasunogan ubos sa state of calamity.
Kini alang usab sa daling pagpagawas sa calamity fund sa dakbayan aron i-ayuda ngadto sa mga fire victim partikular na sa nag-unang panginahanglan niini.
Ang konsehal nga maoy chairman sa Cebu City Disaster Coordinating Council miingon hinuon nga padayong gihatagan sa siyudad og pack meals ang mga biktima. - Elly Bolonos (BANAT NEWS)