Lapulapu may 'Police Divers' na

CEBU - Nagmalampuson ang unang hugna sa gihimong "Scuba Diving Open Water Training" sa kapolisan sa dakbayan sa Lapulapu sa Tambuli Beach Resort sud sa duha ka adlaw nga training niadtong milabay'ng Sabado ug Domingo.

 Ang maong training gipangulohan ni Lapulapu City Police Office OIC- director Sr. Supt. Mariano Natu-el Jr. uban sa duha ka LGU personel ug usa ka sakop sa media diin miabot sa 15 ka mga tawo ang gipaubos sa maong training. Matud pa ni Natu-el ang katuyuan sa maong training alang sa pagpangandam sa ilang ilusad nga mga "police divers" nga mao unya ang moprotiher sa kinaiyahan ilawom sa kadagatan ug sa bisan unsang panghitabo nga kinahanglang moresponde sa kadagatan sama sa illegal fishing ug uban pang kalamidad.

 Sa sunod nila nga session karong Sabado sa Talima sa isla sa Olango ang mga trainees molangoy   sa napulo ka metros nga giladmon ug ang molampos mahatagan og sertipiko sa maong kurso nga ilang gitun-an. (Bong Soriano) (BANAT NEWS)