CEBU - Sulbad na ang kasong pagtulis sa LBC Hari ng Padala niadtong Huwebes sa udto diha sa barangay Banilad ning dakbayan sa Sugbu human madakpi ang usa sa upat ka mga tulisang hulga ra ug di armas maoy gigamit aron makuha ang kapin P80 mil.
Matud ni Sr. Supt. Patrocinio Comendador, direktor sa kapulisan sa dakbayan nadakpan ug positibong giila sa mga kahera ang usa sa mga suspek nga si Rico Bontuyan, 30, diha sa sitio Dita barangay Pulangbato ning dakbayan.
Padayon pang gipangita ang laing tulo ka mga kaubanan niini nga gituuhang nagtagotago pa gikan sa mga polis.
Ang duha ka mga cashier nga saksi nga sila si Giecen Mae Obsioma ug Mary Caryn Nasataya positibong miila kang Bontuyan nga maoy usa sa mga mitulis kanila.
Kasong robbery ang ilang gipasaka kang Bontuyan kagahapong adlawa, ingon man sa tulo ka mga John Does, ingon man dugang kaso nga acts of lasciviousness human usa sa mga suspek ang mihinol sa dughan ug pribadong parte sa lawas sa usa sa mga kahera atol sa hitabo.
Si TRS chief, Sr. Insp. Michael Anthony Bastes nagkanayon nga nakadawat sila og report nga adunay mga tawong miadto sa LBC ug nangita sa mga saksi hinungdan nga gipahigpitan sa CCPO ang pagbantay sa mga kawani.
Nakakuha usab ang kapulisan og dugang impormasyon nga nadakpan na niadtong miaging bulan sa Hulyo ug nakapiyansa sa kasong paghupot ug gamit sa ginadiling drogas si Bontuyan.
Gisubay na usab ang ubang insidente sa mga tulis diha sa Talamban tungod kay mitakdo sa height niini ang mga gitumbok usab nga mga tulisan.
Apan si Bontuyan mihimakak sa pasangil ug nanawagan sa mga testigos nga klaruhon ang ilang akusasyon tungod kay sa pagkahitabo nangubkob siya og balas sa sapa aron ibaligya.
Ang inahan niining si Tita, 61, ug asawang si Liezylyn, nagtuong nasaypan ra kini gumikan kay sila mismo nakakita sa suspek nga gikan nanguha og balas. (BANAT NEWS)