'Goons' nang-harass og pamilya mayor, mihimakak

CEBU - Tulo ka tawo nga giingong mga “goons” sa usa ka mayor sa habagatang bahin sa lalawigan sa Sugbu ang gipasanginlang nang-harass sa usa ka pamilya nga taga dakbayan sa Sugbu dihang sila miduaw sa ilang yuta niadtong Sabado sa alas 8:30 sa gabii diha sa sitio Kasadya barangay Sta. Cruz, Ronda.

Si Genara Diaz, 50, taga Balagtas St. sa barangay Pahina-Central ning dakbayan dihang gihinabi sa Banat News nagkanayon nga nag-ayo sila sa kural sa ilang luna sa maong dapit ug nananom og kahoy dihang kalit lang nga usa ka Vicente Pisalon “alias” Inting ug anak sa ilang saop ang nipasumbingay kanila sa pag-ingon “tagsa ka libo nalang ang pangayo sa bukid…(dayon senyas sa kamot niini nga daw nagluglog sa liog).

Nasayran nga nasuko si Pisalon kanila tungod sa ilang pagkural sa luna kay masirhan ang agianan.

Apan nianang pagka-alas 8:30 sa gabii human sa ilang pagpanihapon uban sa iyang anak nga si Roxie ug asawa niining si Lydda ug 3-anyos nilang anak ug kahigalaan kalit nga mipaka-paka ang buto sa armas.

Pila ka segundos ang milabay giduol sila sa tulo ka mga armadong lalaki, usa kanila giila nilang ginganlan og “Jecjec” bisan pa kini nagsuot og bonnet kinsa nipahipi dayon sa ngitngit.

Ang usa miduol sa ilang mga kauban nga niadtong tungura nag-text sa multicab ug gipangita si Genara.

Diha-diha niduol ang usa ka suspek ug nipabuto makalima ka higayon sa atubangan ni Roxie dayong bahad pag-ingon og “gusto ka putol-putolon ko na imong lawas og bala?”

Tungod sa kalisang gigakos nalang sa magtiayon ang ilang 3-anyos nga anak ug nanulod sa cottage ug human mamatikding namiya na ang tulo nagkara-kara sila’g panakay sa multicab ug mipauli balik sa dakbayan sa Sugbu ug wala na makasumbong sa kapolisan.

“Ako Dong mosang-at gyud ko’g reklamo batok sa maong mga “goons” sa mayor ilado mana kaayo sila diri sa mga tawo dili lang mogawas og adlawan kay magabii lang mag-roving,” sumala ni Genara nga miangkong nagkurog sa kahadlok.

Apan ang nahisgutang mayor (ngan gipugngan hangtud wa pay pormal nga reklamo) dihang gitawgan sa Banat News sa telepono miawhag kang Diaz sa pagpa-blotter sa maong insidente aron iyang maaksyunan.

Apan hugtanong gipanghimakak niini nga duna siya’y “goons” ug mihagit sa mga tawong mipasangil pagprubar niini.

Giangkon hinuon niini nga may nailhan siyang tawong ginganlan og “Jecjec” ug kun ugaling iyaha kining makit-an iyaha kining sudyaan bahin sa reklamo. - Guam Logroño (BANAT NEWS)