Gibuwagan sa uyab nanunggab

CEBU - Gidunggab sa usa ka ulitawo ang uyoan sa iyang hinigugma human siya buwagi niini ug nasayrang gibinuangan lang siya sa babaye nga gikarelasyon sulod sa upat ka adlaw sa barangay Argawanon lungsod sa San Remegio niadtong Biyernes sa alas 3:15 sa hapon.

Ang suspetsado mao si Celso Jakosalem, 28, samtang ang biktima mao si Felix Andrino, pulos molupyo sa nahisgutang lugar ug uyoan sa hinigugma sa suspek.

Matud pa sa suspek dihang nahinabi sa Banat News sa telepono nasuko siya sa biktima tungod kay kanunay lang siyang pangayoan niini og kwarta aron ipalit og ilimnon.

Gidugang sa suspek nga nisamot ang iyang kalagot niadtong petsa 2 ning bulana atol sa Kalag-kalag dihang nagkasinabot na unta sila ug sa pag-umangkon sa biktima nga mangatubang na siya sa ginikanan sa dalaga aron pakigminyoan siya, apan nakurat siyang dihang gibuwagan siya sa uyab.

Matud sa suspek tungod niini misuway siya og hikog pinaagi sa pag-inom og pesticide apan nadala siya dayon sa tambalanan.

Nagduda siyang gipangwartahan lang siya sa biktima maong gisulsulan siya niining panguyaban ang iyang pag-umangkon.

Niadtong niaging adlaw nakahukom siya nga sulngon ang biktima ug iyaha kining nadunggaban. - Darrel Carumba (BANAT NEWS)