'Walk Against Drugs' himuon karon

CEBU - Gihagit sa Dangerous Drugs Board (DDB) ang publiko nga mosalmot sa ipahigayong ‘Walk Against Drugs” karong buntag dinhi sa dakbayan sa Sugbu.

Kining maong hagit gihimo ni DDB Undersecretary Atty. Clarence Paul Oaminal, kinsa miingon nga kini maoy usa ka “Symbolic Walk” sa DDB sa pagpakita niini og dakong suporta sa kalihokan nga gipasiugdahan sa Cebu City Anti-Drugs Abuse Council (CADAC) uban sa pagtambayayong sa nagkadaiyang organisasyon ug sector sa katilingban.

Matud pa ni Oaminal nga kining maong proyekto gilusad sa DDB aron ipakita niini sa katawhan ang kainit sa gobyerno sa paggukod batok sa mga nalambigit sa pagpamaligya sa ginadiling drugas dili lamang dinhi sa Sugbu kundi sa tibook nasud.

Ang grupo sa mga mosalmot niining lakaw batok drugas adto mag-abot sa eskina sa South Road Property (SRP) sa habig sa barangay Mambaling ug inighagtok gyud sa alas 5:30 karong buntag magsugod na ang maong lakaw nga motadlas sa mga barangay nga nabaniog nga adunay daghang illegal nga drugas sama sa Duljo-Fatima, Sawang Calero ug Suba-Pasil.

Ang maong lakaw tapuson diha na sa barangay Ermita Sports Complex diin dunay ipahigayong santos nga misa alas 6:30 sa buntag.

Gipaabot nga may kaliboan ka tawo ang mosalmot sa maong kalihukan nga ubanan usab sa mga sakop sa Association of Barangay Council (ABC), mga estudyante sa nagkadaiyang tunghaan ug nagkadaiyang organisasyon. - BANAT NEWS