Trainor sa DMDP mi-awol
CEBU - Gikonsiderar na sa labaw sa Department of Manpower Development and Placement (DMDP) sa Cebu City Hall, Edna Jaca, nga Awol kon Absent Without Official Leave ang iyang usa sa 23 ka mga trainors.
Kini tungod kay hangtud niadtong Biyernes wala na mopatim-aw sa ilang buhatan si Marie Paz Amorado sukad niadtong miaging semana.
Ang nahisgutang trainor una nang gireklamo sa mga trainees sa Industrial Sewing Machine Operation (ISMO) nga wala na mopakita kanila human makolekta ang P100 sa dose ka trainees alang sa ilang project.
Apan matod sa mga reklamante nga human nila mahatag ang kwarta niadtong Nobyembre 3 ngadto kang Amorado wala na kini mopakita kanila.
Matud ni Jaca nga iya nang gipadad-an og memorandum si Amorado niadtong miaging semana apan giingong kini wala na sa ilang gipuy-an.
Tungod niini, gitakda nang itaho sa labaw sa DMDP si Amorado ngadto sa Personnel Department alang sa tukmang lakang nga himoon.
Gusto ni Jaca nga mahulipan si Amorado sa labing dali nga panahon tungod kay giingong nagkuwang karon ang ilang mga trainor.
Nasayran nga ang DMDP duna lay 23 ka trainor nga maoy motudlo sa kapin sa 600 ka mga trainees matag tulo o unom ka buwan. - Elly Bolonos (BANAT NEWS)
- Latest
- Trending
