LTFRB-7 wala motuman sa moratorium sa prangkisa
CEBU - Giawhag sa dakbayan ang Land Transportation Franchising and Regulatory Board (LTFRB-7) tumanon ang gipatumang moratorium sa pagpang-isyu og prangkisa sa mga sakyanan.
Si Cebu City Acting Vice Mayor Edgardo Labella nagkanayon nga dunay mga report nga nagpadayon pa gihapon ang LTFRB-7 pagpang-isyu og prangkisa.
Nakamatikod usab si Labella nga nagkadaghan karon ang pampublikong mga sakyanan ilabi na dinhi sa dakbayan sama sa mga jeepney ug taxi units ug uban pa.
Wala usab isalikway ni Labella nga may posibilidad nga kini maoy usa sa mga hinungdan nga dili malikayan ang mga disgrasya sa kadalanan matag adlaw.
“Atong nahibaw-an nga daghan kaayo karon og mga aksidente tungod siguro ni sa kadaghan sa mga sakyanan mao nga grabe ang kompitisyon,” sumala ni Labella.
Usa usab kini sa hinungdan nga may mga drayber nga sa paninguhang makakuha og pasahero sagad makalapas na sila sa balaod sa trapiko.
“Unta matan-aw ni og maayo sa LTFRB kay mura man og nisobra na ang gidaghanon sa mga taxi ug PUJ nga duna man untay moratorium,” dugang pamahayag ni Labella.
Gikatahong dunay mga taxi operators na nga nisumbong kaniya nga naglisod na pagpabiyahe sa ilang mga taxi tungod sa kakulang na sa mga driver. - Elly Bolonos (BANAT NEWS)
- Latest
- Trending
