Kanhi Brgy. Kap nalutsa'g warrant

CEBU - Nagtingkagol na sa karsel sa kapulisan sa lungsod sa Asturias ang usa ka rebel returnee ug kanhi barangay kapitan sa barangay Tagbubonga human malutsi og warrant of arrest sa kasong frustrated murder.

Ang akusado giila nga si Carlito Sandag, 55, minyo, nadakpan kagahapon sa kaadlawon diha sulod sa barangay hall sa Tagbubonga human pinasikad sa warrant of arrest nga giisyu ni Regional Trial Court (RTC 23) Judge Generosa Labra.

Si SPO1 Jayme Roxas sa Asturias Police Station nga gikahinabi sa Banat News nagkanayon nga ang maong kaso naglambigit kang Sandag nga maoy gipasanginlang triggerman sa pag-ambush kang Antonio Quizon nga usa ka union leader diha sa Atlas Mining dakbayan sa Toledo niadtong 2005.

Matud pa ni SPO1 Roxas nga ang ilang hepe nga si Inspector Gerald Ace Pelare ug mga kaubanan maoy nisikop ni Sandag sulod sa barangay hall hinuon   wala kini mopakita’g pagsukol sa kapulisan.

Atol sa pagdakop kaniya nakuhaan kini og usa ka .38 snub-nose revolver nga may lima ka mga buhing bala apan walay lisensyang napakita hinungdan nga idugang kini sa kasong iyaha nang giatubang.

Ang akusado matud pang SPO1 Roxas hugtanong mihimakak sa maong pasangil ug nipadayag nga aduna siya’y mga testigos nga makapamatuod nga diha ra siya sa ilang barangay atol sa pag-ambush si Quizon.

Gikatahong human mobiya ni Sandag sa kalihukan sa mga rebelde nahimo siyang aktibo sa habig sa gobiyerno ug nahimong kapitan sa ilang lugar ug karon gihulipan sa iyang asawa nga si Miguela isip bag-ong kapitan. - Guam Logroño (BANAT NEWS)