CEBU - Gitinguha sa konseho sa dakbayan sa Mandaue nga mahibaw-an sa publiko ang ilang mga gimbuhaton sa panahon sa ilang regular session pinaagi sa pagpasundayag niini diha sa ilang kaugalingong programa sa telebisyon.
Gani migahin sila karon og P1.5 milyones alang sa maong programa sa telebisyon nga kuhaon gikan sa ilang savings nga gipundo.
Si Bise Mayor Carlo Fortuna mipasabot nga ila kining himoon aron labi silang mahiduol sa katawhan.
Miingon si Fortuna nga diha sa sesyon nga bukas nga makita sa publiko anha nila masuta ang labok sa mga konsehal sa dakbayan.
Hinuon dili lamang ang pagkamaayo motabi sa usa ka konsehal, mao nay barometro nga siya usa ka maayong lake diha sa konseho, kundili anha kini masuta pinaagi sa mga proyekto nga ilang nahatod ngadto sa katawhan nga ilang gialagaran.
Gawas sa pag-pasundayag live sa ilang regular session, gusto usab nila nga ma-interbiyo usab ang mga konsehal aron makapasabot sila bahin sa tumong sa ilang ordinansa nga pagatukion.
Dugang pa niya nga gikinahanglan kaayo nilang mga opisyal nga masayod ang katawhan sa ilang gimbuhaton sulod sa session hall kun sila magsesyon ilabi na kun magtuki sila og mga resolusyon o kaha ordinansa.
Naglakip usab sa ipasundayag sa airtime sa telebisyon mao ang mga public hearing nga pagahimuon sa matag komite aron ikahatod ngadto sa publiko ang tukmang mga kasayoran sa mga isyu nga tukion sa maong hearing.
Ang maong programa sa TV ipasundayag lima ka adlaw matag semana matud pa ni Majority Floor Leader Victor Biano.
Sa nasayran nga ang Public Information ni Mayor Jonas Cortes nagplano na usab sa pagpagawas sa ilang kaugalingong newsletter nga momantala sa mga kalihokan sa mayor. – BANAT NEWS