Gamay ra ang mi-avail sa PNP Gun Amnesty

CEBU - Mas nigamay karon ang gidaghanon sa mga nikuha og lisensya ingon man nagpa-renew sa lisensya sa ilang mga armas sa gihatag nga Gun Amnesty Program sa Philippine National Police.

Kini maoy gibutyag sa hepe sa Firearms and Explosives Security Agency Guards Supervisory Section-7 Chief Insp. Jacinto Cesar sa pakighinabi sa Banat News.

Ang PNP mihatag og gun amnesty sugod niadtong milabay’ng tuig ug pormal nga mitapos kagahapon.

Si Cesar wala pa hinuon makakumpleto sa listahan kun pila gyud ka armas ang narehistro ug nagpa-renew karon apan base sa iyang naobserbahan sa gidaghanon sa ilang giproseso mas gamay kini kun itandi sa milabay’ng katuigan.

Usa sa gituuhang rason ni Cesar mao ang pagpatuman sa Executive Order 585 nga nagdili na sa pagpalisensya sa mga paltik nga mga armas ug ingon man ang kamahal karon sa bayranan sa pagkuha sa maong mga dokumento.

Matud pang Cesar tuyo sa gun amnesty mao nga madokumentohan ang tanang armas sa nasud ingon man mamenosan ang gidaghanon sa mga loose firearms.

Ikaduha mao ang pundong makuha gikan niini magamit aron ipalit og teknolohiyang makarekord sa tanang ballistics records sa mga armas aron mas masayon pagsubay kung kini dudahang nagamit sa krimen ug uban pa nga gitawag og firearms identification system nga hangtud karon wala pa sa PNP.

Giangkon ni Cesar nga dunay posibilidad nga daghan pa karon ang mga loose firearms nga wala ma-account sa milabay’ng gun amnesty.

Sagad sa mga insidente sa krimen nga naglambigit sa pusil sagad wala kini rekord sa Fesagss ug gituuhang mga loose firearms kini ug mga paltik.

Apan si Police Regional Office-7 director, Chief Supt. Ronald Roderos sa pakighinabi sa Banat News nagkanayon nga di angayang pakasad-on ang paltik kundili ang mga tawong mogamit niini isip instrumento sa krimen.

“Paltik itself can’t make crime, it is the person who uses it as an instrument to commit crimes,” sumala pang Roderos kinsa midugang nga   ang PNP walay puas sa pagpahigayon og mga kampanya aron mamenusan ang krimen.

Matud pang Roderos ang katuyoan sa pagdili na sa pagpalisensya sa mga paltik kini aron ma-discourage na ang mga tawong iligal nga nanghimo niini ug aron usab di makaapekto sa mga lehitimong tighimo og armas.

Sumala pa niya nga angayan timan-an sa publiko ang tanang elemento sa krimen kini mao ang oportunidad sa kriminal paghimo niini; ang intensyon, motibo ug rason sa kriminal ug ang ikatulo instrumento nga gigamit sa krimen. – BANAT NEWS