Abogada wala motago

CEBU - Nasagmuyo ang usa ka abogadang gipasanginlang nakaligis og tawo diha sa barangay Guizo sa dakbayan sa Mandaue gumikan sa giingong nigawas nga balitang daw intensyon gyud niyang moikyas sa krimen.

Si Atty. Arlinda Famulaga kinsa mitawag sa Banat News sa telepono mitug-an nga di tinuod ang mga balitang miikyas siya sa pagkahitabo kundili wala gyud siya’y kalibutan nga duna siya’y nadasmagang tawo niadtong Miyerkules sa gabii.

Ang abogada maoy gipasanginlang nakabangga ug nakaligis kang Castro Estiola nga niadtong tungura nagmaneho og motorsiklo nga miresulta sa kamatayon niini.

“Ako as a responsible lawyer ug naa nasad koy mga grand children di ko mag-ingon ana (eskapo)….I have nothing to hide nga mo-flight ko nga wala man koy nabantayang nabanggaan,” pasabot pa sa 72-anyos nga abogada.

Sumala pa niini nga gikan sa Ayala sa Cebu City hinay ra kaayo ang iyang padagan sa Honda CRV pauli sa ilang balay sa Estancia-Ibabao sa samang dakbayan.

Samtang gibasol usab niya ang mga testigos nga “nisunod” kaniya tungod kay nganong wala siya dayon babagi ug gipahibalong duna kini tawong nadasmagan aron di naingon niini ang nahitabo.

Nahibulong nalang siya dangtan ang kapin 30 minutos may nanuktok nga tawo sa ilang balay ug kini mga polis ug wala mailhing mga tawo, tungod kay wala gyud sila makasiguro sa kung unsa gyuy nahitabo wala nila tuguting makasulod ang ubang mga tawo lakip na mga sakop sa media.

Ang bana (di buot magpahingalan) sa anak ni Famulaga kinsa maoy unang mitawag sa Banat News kagahapon nagkanayon nga wala gyud sila makabati og bisan unsang kausaban sa linihukan sa iyang ugangan pag-abot niini gikan sa trabaho.

Matud niya kung duna pay gitagoang hitabo ang iyang ugangan niadtong tungura kini ilaha gyud untang mamatikdan.

Samtang gidepensahan niya ang ugangan kabahin sa giingong daw lama sa pintal sa motor ug garas diha sa sakyanan gumikan kay pintal kini nga plain yellow sa dalan nga nipilit ug ang giingong garas dugay na kini ug wala gani makalumping sa sakyanan.

Hinuon si Famulaga nagkanayon nga andam siyang mobayad sa nakalas base sa kung unsay gilatid sa comprehensive insurance sa iyang sakyanan apan miklarong wala kini magpasabot nga giangkon niya ang pasangil.

Matud niya isip usa ka abogado ug gumikan kay nakalas gyud ang biktima nga giingong siya maoy nakaingon base sa alegasyon sa mga testigos andam siyang mobayad niini lakip na pag-atubang sa kaso.

Si Famulaga nakapiyansa na og P30 mil alang sa iyang temporaryong kagawasan ug nabalik na ang iyang sakyanan sa ilang balay, apan gumikan sa nibutong balita kabahin sa “hit and run” nga pasangil kaniya gidid-an una niyang pahugasan ang sakyanan aron maklaro ang tanan. – BANAT NEWS