CEBU - Nisang-at og pormal nga reklamo ngadto sa Department of Education (DepEd) ang dili muminos 16 ka mga ginikanan sa Grade-IV sa Binabag Elementary School sa siyudad sa Bogo aron ipabalhin ang math subject teacher nga gihulagway nilang kusog manapat sa mga estudyante.
Dugang sa reklamong ilang giduso sa DepEd sa siyudad sa Bogo niadtong Martes sa alas 9:00 sa buntag nga dunay usa ka grade-IV nga tinun-an ang giingong nakuyapan pipila ka mga semana na ang nilabay human gibuwad sa init sa maong magtutudlo tungod lang kay ni-absent ang bata tungod kay gihilantan.
Kahinumduman nga dunay usa ka iyaan sa 10-anyos nga batang babaye tinun-an sa grade-IV ang una nang nagpa-blotter sa kapulisan human nitug-an ang bata nga giparok ang iyang ulo sa blackboard ug pagkahuman gibunalan og stick sa maestra atol sa ilang math subject niadtong petsa 25 sa bulan sa Oktubre sa alas 2:00.
Miduso na usab siya og reklamo batok sa maong maestra ngadto sa buhatan ni DepEd Bogo City head Barnardo Ysolan.
Matud pa sa mga reklamo sa mga ginikanan batok sa magtutudlo sagad sa rason nganong mag-cutting classes ang mga tinun-an inig kahapon kini aron makalikay kaniya.
Giawhag nila ang DepEd nga ipabalhin og laing tunghaan ang maong magtutudlo aron dili na mahadlok ug mopadayun na sa pag-eskuwela ang ilang mga anak.
Ang ubang mga ginikanan nga namirma sa maong reklamu nga nagtinguha nga mabalhin og laing tunghaan ang maestra mao sila si Delia Ngujo, Julieto Masong, Nilda Tabac, Marites CAlapando, Helen Calapando, Nelso Tabal, Wilfredo Mondero, Carmelo Umpad, Fely Nuñez, Teresita Bedrijo, Lydrex Saler og Anabel Tabal.
Matud ni Emma Patalingjug ang social welfare officer sa DSWD dihang nahinabi sa Banat News nga ipaubos sa psychological examination ang 10-anyos nga giparok kay gituohang na-trauma kini. – BANAT NEWS