Ocarol Maproblema pagbalik

CEBU - Gipaabot nga mag-atubang unya og problema si Pasil barangay captain Romeo Ocarol atol sa iyang pagbalik dinhi sa Sugbu.

Kini kung dunay mokwestyon sa iyang kapakyas pagpauli, subay sa nalatid sa iyang travel order nga gipirmahan ni Mayor Tomas Osmeña.

Ang kapitan nananghid nga mobakasyon og tulo ka buwan ug nilarga ngadto sa Estados Unidos niadtong miaging Agosto 12.

Apan napupos na ang gipangayong bakasyon ni Ocarol ug kini wala pa makabalik sa iyang katungdanan isip barangay kapitan.

Gipadayag ni DILG-7 Director Pedro Noval nga gikinahanglan og pirma sa kalihim sa DILG ang travel order sa usa ka opisyal kung molapas sa tulo ka buwan ang bakasyon niini.

Apan nasayran gikan sa secretary sa barangay Pasil nga si Gina Gonzales nga si Osmeña lang ang nipirma sa travel order sa kapitan.

Nidugang si Gonzales nga pirmado usab sa DILG ang nahisgutang dokumento apan kini gihimakak ni Noval.

Ang chairman sa Committee on Public Accountability and Good Government sa City Council nga si Konsehal Edgardo Labella nitataw nga duna unyay tulubagon si Ocarol.

“If it is a violation of a memorandum circular then he has somehow held accountable for that so he has to explain why,” sumala ni Labella.

Kasaligang tinubdan nibutyag sa Banat News nga ang pagbiyahe ni Ocarol ngadto sa Amerika buhaton niini matag human sa barangay election.

Nidugang ang tinubdan nga ang kapitan manarbaho una didto sa Estados Unidos aron ibayad sa iyang mga obligasyon dinhi sa Sugbu.

Gitataw hinoon ni Gonzales nga kanunay gihapon ang ilang komunikasyon sa kapitan ug kini giingong nipahibawo nga mubalik na sa hinapos nga bahin niining buwana. – BANAT NEWS