Mas bug-at nga silot vs. reckless driving suportado

CEBU - Gipasalig ni Cebu City Councilor Raul Alcoseba nga iyang suportahan ang balaudnon nga magpahamtang og mas bug-at nga silot batok sa abusadong mga driver.

Partikular na niadtong mga driver nga makadasmag og tawo nga moresulta sa pagkaangol o pagkamatay ba hinuon sa biktima.

Ang gitumbok ni Alcoseba nga balaudnon mao ang giduso ni Senador Francis Escudero sa Senado nga mag-amendar sa Article 365 sa Revised Penal Code.

Sa proposed measure ni Escudero patas-an ang silot gikan sa 12 ka tuig ngadto na sa 20 ka tuig nga pagkabilanggo kung mamatay ang biktima sa vehicular accident.

Samtang kadtong mga driver nga makaangol sa ilang gidasmagan mahimo na usab unya nga mabilanggo og hangtud sa 12 ka tuig ubos sa maong balaudnon.

Napanglantawan ni Alcoseba nga magmatngon na unya ang mga driver ilabi na sa publikong mga sakyanan kung mahingpit nang balaud ang proposal sa senador.

“Maayo na kay karon man gud daghan kaayo tang madungog nga mga vehicular accident tungod sa reckless nga mga driver,” sumala ni Alcoseba.

“Dili man gyud na malalis nga kung bug-at ang multa o silot nga ipahamtang, mas doble ang pag-amping sa mga tawo nga dili masayop,” dugang ni Alcoseba.

Ang konsehal nga maoy chairman sa Committee on Traffic Management sa City Council nagtuo nga kini makatabang unya pagdisiplina sa mga driver.

Nasayran nga ang Pilipinas nalakip sa listahan sa mga nasud nga dunay labing daghan og mga kaso sa aksidente sa kadalanan.

Kini base usab sa resulta sa usa ka pagtuon nga gipahigayon sa Asian Development Bank (ADB) nga gipagawas dili pa lang dugay.

Nagkanayon si Alcoseba nga usa ka resolusyon unya ang iyang ipalabang sa City Council nga magsuporta sa balaudnon ni Escudero. - Elly Bolonos (BANAT NEWS)