CEBU - Wala tungaha sa giimbitar nga mga stakeholders ang gitakdang public hearing niadtong miaging adlaw sa usa ka ordinansahon sa dakbayan sa Sugbu nga magsilot niadtong mga welgistang magtabon sa ilang mga nawong.
Ang gi-indyan nga ordinansahon mao ang proposed measure ni Acting Mayor Hilario Davide III tungod sa giingong peligro sa maong binuhatan sa pipila ka mga raliyista ug welgista sa habig sa ilang grupo ug sa publiko sa kinatibuk-an.
Gibasol sa mga sakop sa konseho ang secretariat nga maoy gisangunan pagpadala og imbitasyon tungod sa wala mahinayon nga public hearing.
Ang presiding officer nga si Acting Vice Mayor Edgardo Labella wala hinuon makakita og dinaliang panginahanglan nga mapasar ang nahisgutang ordinansahon.
Tungod niini, gisugyot ni Labella nga isibog na lang ang public hearing aron makatambong ang gipang-imbitar ilabina ang nagkadaiyang labor group/union.
“This proposed measure is not of an urgent character and I think there is nothing wrong if we will schedule another public hearing on this,” sumala ni Labella.
Wala hinuoy nisupak sa mga sakop sa konseho sa sugyot sa acting vice mayor apan ilang gipasidan-an ang secretariat nga siguruhon niining manunga ang gipang-imbitar.
Nasabutan sa City Council ang pagtakda sa public hearing sa ordinansahon ni Davide unya sa Disyembre 10.
Ubos sa proposed measure ni Davide, mahimong makamulta ug mabilanggo ang mga welgista sa higayon nga makalapas niini.
Sa nasayran, si Mayor Tomas Osmeña maoy nisugyot kang Davide nga pangamahanan ug ipalabang ang nahisgutang ordinansahon tungod kay siya mismo personal nga nakasaksi sa mga welgista sa usa ka department store sa dalan Colon nga nagtabon sa ilang mga nawong.
Nahimong kontrobersyal ang mayor niadtong higayuna human niini pangunayi og badlong ang mga welgista bitbit ang iyang armas. - BANAT NEWS