Forwarder gitulis sa upat

CEBU - Gisakiyo sa upat ka tulisan ang gibana-banang kapin P80 mil nga cash ug mga cellphone diha sa LBC Hari ng Padala sa usa ka department store sa barangay Banilad ning dakbayan kagahapon sa udtong tutok

Ang duha ka mga customer associates sa LBC nga sila si Giecen Mae Obsioma ug Mary Caryn Nasataya mitug-an nga kalit lang nisulod ang upat ka mga wala mailhing tawo ug diha-diha ang duha nideklarar og hold-up samtang ang duha ka mga kauban nagsilbing back-up.

Ang nag-inusarang kustomer nga si Candida Mondoñedo nakuhaan sa iyang 1100 nga cellphone nagkantidad og P4 mil.“Nag fill-up ko sa form kay gisugo ko sa akong amo og padala og kuwarta didto sa Manila nga P500 akong gibutang akong cellphone sa lamesa, kalit lang niingon tong laki nga dakoon sa akong tapad, ‘Hold-up ni ayaw’g palag’ dayong kuha sa akong cellphone. Wala apila og kuha ang kuwarta nga P500 diri sa akong bulsa,” padayag pang Mondoñedo sa dihang nahinabi sa Banat News.

Gihulagway ni Obsioma ug Nasataya ang usa sa duha nga niduol kanila ug maoy nikuha sa kuwarta diha sa hunos, dakoon ang panglawas, itomon ug opaw.

Matud ni Nasataya usa sa mga tulisan nagdala nang daan og kolor itom nga bag ug maoy gisudlan niini sa kuwartang gikuha diha sa ilang hunos nga nagkantidad og P56,200 ingon man ilang mga cellphone.

Si Obsioma gikatahong gimandoan sa laing tulisan nga tultolan siya sa vault ug gipaablihan kini kaniya ug dayong kuha sa P20 mil diha sa sulod.

Matud pa niini nga ang usa ka taason, tambukon, itumon nga ambungan ang panagway maoy nitikang diha sa ilang atubangan nga nanguha sa kwarta diha sa drawer lakip na ang ilang mga cellphone.

“Wala may armas nga gipakita ang upat disente man to sila nag-shorts raman gani to sila niya nagsige ingon pamusilon tamo ron dayong hikap-hikap sa iyang kilid katong tambokon…igo rang nisulti nga tulis niini ayaw pagtan-aw,” matud pa ni Obsioma.

Matud ni Obsioma usa sa mga tulisan ang mihulga kaniyang luguson niini kung di niya ablihan ang vault maong iyaha kining gilalis tungod kay misuway na kini og himo og malaw-ay’ng buhat kaniya.

Ang hepe sa Theft and Robbery Section sa Cebu City Police Office, Sr. Insp. Michael Anthony Bastes nitug-an sa mga tigbalita nga dili pa sila makasulti ning mga panahuna kun unsang grupo ang responsable.

Matud pa niini nga sa pagkakaron ila pang ipaubos sa imbestigasyon ang maong mga empleyado ingon man ang usa ka witness hinuon wa usab nila siraduhi ang posibilidad nga ‘inside job’ ang maong hitabo sanglit matag dunay tulis nga mahitabo dunay kakunsabo sa sulod ang mga gikatahapan.

Nakita ni Bastes nga huyang ang seguridad nga gipatuman sa maong mall kini tungod kay way mga security guards sa maong dapit ug duna pa kini nakit-ang gwardiyang on-duty nga wala gani armas.

Matud ni Bastes nadawat nila ang alarma 10 minutos na ang nakalabay una pa sila gipahibalo sa mga guwardya sa maong mall.

Si Julius Buhia, legal staff associate LBC head office nga nagbase sa dakbayan sa Lapulapu mitug-an sa mga tigbalita nga walay security camera ingon man gwardiya ang maong branch.

Gitug-an usab ni Buhia nga matag duna silay tigum sa ilang kompaniya kanunay gyud nga gipahimangnuan ang tanang empleyado nga magbantay kanunay tungod kay napanglantawan sa ilang mga kadagkuan nga mouso gyud ang tulis basta magsingabot ang kapaskuhan apan giklaro niya nga kini maoy unang higayon nga sila maoy nabiktima sa tulis. - BANAT NEWS