Usa ka technician gipusil, giluba ang liog

CEBU - Nagpabilin pa karong blangko ang kapolisan sa pagtumbok sa kriminal kinsa nidunggab ug nipusil patay ngadto sa usa ka technician ug mang-assemble og videoke nga gibiyaan lang sa dalan sa sitio Anislag, barangay Canlumampao, siyudad sa Toledo kagahapon sa alas 3:00 sa kaadlawon.

Ang biktima mao si Apolinario Tiin Jr., 39-anyos, minyo, taga barangay Talavera sa maong siyudad, usa ka technician ug manghimoay og videoke nga ipangbutang sa katindahanan sa maong siyudad.

Matud ni PO3 Benidecto Babilles sa Toledo City Police dihang nahinabi sa Banat News nga ang biktima nagbuy-od nang wala nay kinabuhi nga naputos sa samad dinunggaban ug pinusilan sa liog daplin sa karsada sa maong lugar dihang naagi-an sa usa ka drayber sa habal habal nga naila lang sa pangalan nga “Tipio” ug maoy nipahibalo sa mga kabanay sa biktima.

Ang bayaw sa biktima nga si Jevel Ebisa, hingkod ang panuigon mao nay nagpahibawo ngadto sa kapolisan kabahin sa maong hitabo.

Subay sa pasiunang imbistigasyon sa mga polis nga ang biktima nagsakay sa iyang motorsiklo nga Sky Go kolor yellow nga paingon sa barangay Casoy apan gi-atangan kini sa wala mailhing kriminal.

Nasuta sa gihimong pakisusi sa kapolisan nga ang biktima dunay duha ka samad dinunggaban ug pinusilan sa iyang liog .

Dunay pipila ka mga molupyo sa maong lugar ang nitug-an ngadto sa kapolisan nga nianang pagkagabii nakadungog sila og tulo ka buto sa pusil.

Ang kapolisan sa lugar ang padayon nga mipahigayon og imbestigasyon sa pagpiho sa motibo sa kremin sanglit gisalikway niini nga pagpanulis ang usa sa hinungdan sa pagpatay tungod kay wala hilabti ang cellphone ug ang kwarta sa biktima nga diha sulod sa pitaka niini.

Ang kapolisan naka-recover og usa ka buhing bala sa 9mm pistol mga 20 ka tiil ang gilay-on gikan sa nahimutangan sa biktima. – BANAT NEWS