CEBU - Suspetsado sa pagpanunggab gamit ang sundang ngadto sa anak sa mayor sa dakbayan sa Talisay nga si Joavan Fernandez ang gireklamo sa iyang silingan nga namusil ngadto kanila ug maayo na lang kay mikagar ang gigamit niining pusil niadtong Martes sa alas 9:00 sa gabii sa sitio Magay, barangay Tanke sa nahisgutang siyudad.
Ang biktima giila sa mga polis nga si Maria Julia Macaraya, 46-anyos, usa ka manindahay og isda ug residente sa maong lugar.
Base sa imbestigasyon sa mga polis nga si Macaraya ang nagpahuway diha sulod sa ilang balay uban sa iyang pamilya nga nagtan-aw og programa sa telebisyon.
Si Randy Bazar, 30, nagpuyo usab sa maong barangay kinsa giingong bangag sa ginadiling drugas ang kalit lang mitungha diha sa pultahan sa balay ni Macaraya ug sa walay igong rason gipusil siya niini apan swerte kay mikagar ang pusil.
Sa maong hitabo si Macaraya ang daling mitaho ngadto sa mga polis kinsa si Bazar ang dali usab nga mibiya sa lugar.
Apan kagahapon sa buntag si Macaraya ang nanawag diha sa police station sa barangay Poblacion ug nangayo og panabang sa mga polis tungod kay nakita niini si Bazar nga nagbit-bit og sundang diha sa ilang lugar ug giingong nangita og samok.
Ang mga polis ang daling miresponde sa maong taho apan wala na nila maabti si Bazar.
Kahinumduman nga si Bazar ang suspetsadong midunggab ngadto kang Joavan gamit ang sundang sa milabay’ng mga buwan dihang ang anak sa mayor mianha sa sitio Magay.
Sa maong insidente si Joavan ang nakaangkon og kadlas sa kilid nga bahin sa iyang lawas ug dali kining mibiya sa lugar samtang si Bazar ang nagtago-tago usab.
Kahinumduman usab nga sa maong insidente si Mayor Socrates Fernandez ang mihangyo nga bantayan og polis ang iyang anak 24 oras matag adlaw.
Apan ang maong hangyo ang nabasura tungod kay nasuta nga dili angayan ug walay igong basehanan nga si Joavan pabantayan og polis. – BANAT NEWS