CIDG-7 mi-deny nangayo P200T sa tag-iya sa gay bar gironda

CEBU - Gipanghimakak sa   kadagkuan sa Criminal Investigation and Detection Group (CIDG-7) ang pasangil sa manager sa Poseidon Gay Bar nga gipangayoan kini og P200 mil aron dili na ipasaka ang kaso batok sa tag-iya ingon man sa macho dancer nga nadakpan sa ronda niadtong Lunes sa kaadlawon didto sa barangay Pusok, dakbayan sa Lapulapu.

Kini maoy gipatim-aw kagahapong adlawa ni Supt. Ritchie Posadas, Public Information Officer (PIO) ug deputy director sa CIDG-7 ngadto sa mga sakop sa media.

Matud pa ni Posados nga walay kamatuoran ang pasangil ni Mark Anthony Basillo, naila sa pangalang Tony Lakandula nga manager sa gay bar kinsa nakasibat dihang nakasakay og taxi.

Si Basillo mibutyag sa usa ka radio station nga ang mga sakop sa CIDG-7 mitawag sa iyang cellphone nga isibog ang kaso batok sa tag-iya sa gay Bar nga si John Angeles ug macho dancer nga si Rod John Padal kun mobayad og P200 mil.

Matud pa niini nga ang maong pasangil nakaguba sa imahen sa CIDG-7 hinungdan nga gitun-an na sa ilang mga legal officer ang lakang pagpasaka’g tukmang kaso batok kang Basillo nga nailang si Lakandula.

Ang tag-iyang si Angeles nga miatubang sa mga sakop sa media hugtanong mihimakak sa pasangil ni Basillo nga nangayo’g P200 mil ang mga ahente sa CIDG-7 ngadto kanila aron dili ipasaka ang kaso.

Gitataw niini nga ang tinuod mao nga kagahapong adlawa nag-andam silang duha sa iyang dancer og tag P24 mil alang   sa ilang piyansa sa kasong gipasaka nga pagpasundayag nga mangil-ad og show sa entablado.

Si Padal naaktuhan sa mga ahente sa CIDG-7 nga naghubo samtang naligo sa shower ibabaw sa entablado sa gay bar nga gipanag-iya ni Angeles.

Giklaro usab niini nga dili niya consultant si Basillo ug wala usab sila magkinahanglan og consultant sa usa ka gay bar apan gikonpirmar niini nga iya kining manager.

Giangkon usab niini nga aduna gyoy panahon nga mopasundayag ang iyang gay bar og hubo nga mga dancer apan sa mga espesyal lang nga mga panahon. – BANAT NEWS