Fluvial parade sa Lapu malampuson

CEBU - Nagmalampuson ug nagmalinawon ang gipahigayong Fluvial Prosession kagahapon sa buntag nunot sa nagsingabot nga kapistahan sa Birhen sa Regla sa dakbayan sa Lapulapu.

Ang maong kalihukan gisugdan pinaagi sa usa ka Santos nga Misa mga alas 6 kagahapon sa buntag sa Marigondon Parish Church uban sa ilang kura paroko nga si Rev. Fr. Boy Acester ug Fr. Ben Lumbuan.

Human sa Misa usa ka caravan ang gipahigayon uban sa Imahen sa Birhen sa Regla gikan sa maong simbahan hangtod ngadto sa Pacific Cebu Resort sa barangay Suba- Basbas diin nahimutang ang yati nga luwanan sa imahen sa patron sa dakbayan sa Lapulapu ang Birhen sa Regla.

Untop alas 8 sa buntag gisugdan ang paglawig sa yati nga luwan ang Birhen sa Regla subay sa baybayon sa barangay Agus, Maribago, Mactan ug Punta Engaño dayong liko sa Mactan channel ug deretso na sa Muelle Osmeña diin natapos ang maong  kalihukan.

Gibanabana nga moabot ngadto sa 70 ka mga sakyanan sa dagat ang misalmot sa fluvial prosession ug walay labot kadtong mga gagmay’ng  sakayan nga misal-ot lamang sa rota nga ilang giagian.

Bisan pakyas si Mayor Arturo Radaza sa dakbayan sa Lapulapu sa pagsugat sa Birhen gumikan sa iyang dili maayong gipamati sa kalawasan hinungdan nga wala kini makatambong sa maong kalihukan, apan diha ang iyang mga sakop sa konseho sa dakbayan sa Lapulapu nga maoy misakwat sa imahen sa Birhen sa Regla hangtod sa simbahan pinaagi sa usa ka solemne nga prosesyon.

Atol sa Santos nga misa nga gipahigayon sa simbahan sa Birhen sa Regla uban ni Msgr. Achiles Dakay siya mipasabot sa katawhan nga dili lamang kutob sa paghatag og amot sa simbahan ang gikinahanglan sa usa ka tawo nga nanginahanglan og tabang gikan sa Ginoo kun dili kinahanglan nga kini ubanan sa pag-ampo ug pagpasalamat sa mga butang nga gihatag Kaniya.

Gilakbitan usab ni Msgr. Dakay  ang  sitwasyon sa nasud karon diin gumikan sa  kahakog  sa  gahum  nakalimtan na  sa gobiyerno ang kahimtang  sa ekonomiya, insurhensiya ug uban pang problema nga gisagubang sa gobiyerno.