Mandaue City College garbo ni Ouano

CEBU - Gipasigarbo ni kanhi Mandaue City Mayor Thadeo Ouano ang katukoran sa Mandaue City College sa panahon sa iyang administrasyon kay mao kini ang makahatag og kahigayonan sa kabus nga kabataan sa pagpadayon nila sa pagkuha og kurso sa kolehiyo.

Mao kini gibutyag ni Ouano sa iyang pagpamulong atol sa pagbukas sa liga sa basketball sa barangay Umapad sa maong dakbayan sa miaging Domingo diin siya usa sa mga dinapit.

Matud pa ni Ouano nga ang mga kabataan nga anak sa kabus nga ginikanan maglisod sa pagsugakod sa ilang pagtungha sa kolehiyo tungod sa kamahal sa balayranan sa matrikula ilabi na sa   mga pribadong tulunghaan.

Dugang pa ni Ouano nga ang maong panginahanglan sa kabataan nakita usab sa mga opisyal sa ubang lokal nga kagamhanan ug gani nagtinguha usab sila nga magtukod og kaugalingong kolehiyo sa ilang lugar.

Pipila sa mga lokal nga kagamhanan nga nagkisikisi nga magtukod og kaugalingong kolehiyo mao ang lungsod sa Consolacion, dakbayan sa Lapulapu ug dakbayan sa Talisay.

Sa nasayran ang Mandaue City College nga gipahimutang karon sa Eversely Child Sanitarium Hospital nga gidumala sa presidente nga si Dr. Paulus Canete anaa na sa 90 porsiyento sa pagkahingpit.

Kini basi sa gihimong pakisusi sa committee nga gilangkoban sa Commission on Higher Education (CHED) ug uban pa.

Si 6th District Representative Nerissa Soon-Ruiz naggahin og salapi alang sa paghingpit sa mga kahimanan sa maong tulunghaan nga naglakip sa pagpalambo sa library ug laboratory ug gilauman nga matapos sa sunod tuig nga magamit na sa pagbukas sa klase sa Hunyo. – BANAT NEWS