Instructor sa DMDP gipangita sa trainees

CEBU - Nangita na ang mga trainees sa Department of Manpower Development and Placement (DMDP) sa Cebu City Hall sa ilang magtutudlo sa Industrial Sewing Machine Operation (ISMO).

Kini tungod kay giingong wala na motunga diha sa DMDP sukad ilang gipangitaan sa ilang gihatag nga kwarta agi’g amot sa ilang paliton nga panapton.

Matud sa mga reklamante nga silang 12 ka mga trainees miamot og tag-P100 ngadto sa maong instructor nga si Marie Paz Amorado alang sa ilang project.

Apan sukad nga ilang nahatag ang kwarta niadtong Nobiyembre 3 giingong wala na magpakita si Amorado hinungdan nga kini ila nang gireklamo.

Midugang ang mga trainees nga ila na usab nga giduaw ang ilang trainor sa pinuy-anan niini apan wala usab nila mapalgi.

Gusto sa mga reklamante nga iuli ni Amorado ang ilang giamot nga kwarta aron mapalit na ang panapton nga gamiton sa ilang project.

Nasayran hinuon sa Banat News nga gipaimbestigahan na sa labaw sa DMDP ang maong magtutudlo labot sa reklamo.

Gani gipaadtoan pa ni Edna Jaca sa iyang sakop ang panimalay niini apan kini giingong gihilantan hinungdan nga wala makatunga sa DMDP.

Usa sa mga kauban sa maong instructor mibutyag nga posibleng dili na i-renew ang kontrata niini kun mapamatud-ang sad-an sa akusasyon.

Si Amorado nahimong trainor sa DMDP sulod na sa pipila ka tuig, apan giingong nagpabilin pang casual employee hangtod ning higayuna.

Determinado ang mga trainees sa ISMO pagpataktak kang Amorado sa trabaho kun dili iuli niini ang amot nilang kuwarta. – BANAT NEWS