199 ka lawas sa 'Stars' naabot

CEBU - Miabot na kagahapon sa buntag ang 199 ka mga patay’ng lawas nga naugkat gikan sa barkong M/V Princess of the Stars nga nalunod sa Isla sa Sibuyan luwan sa M/V Tacloban Princess sa Sulpicio Lines.

Matud pa ni Dr. Renato Bautista sa NBI- Disaster Victim Identification kon DVI nga dunay pipila ka mga lawas ang kumpleto pa sa ilang mga body parts apan ang uban nawagtang na ang mga kamot ug tiil.

Sa 199 ka mga patay 25 porsiyento niini mga bata ug ang kasagaran mga babaye.

Ang mga patay’ng lawas gisulod sa siyam ka mga 10 footer vans ug gidunggo diha sa Cebu International Port diin usab mahimutang ang mobile morgue ug laboratory diin ipahigayon ang pagkuha og femoral bone aron gamiton sa DNA testing.

Ang pipila sa mga kabanay misugat diha sa pantalan, usa kanila si Chuchie Gabison kansang anak nga si Jonathan Gabison, 27, nga usa ka seaman apil sa missing.

Si Jonathan gikatakdang molarga unta niadtong Hunyo 27 paingon sa Miami Florida sa Estados Unidos aron makasakay sa overseas nga barko isip usa ka seaman.

Matud ni Chuchie si Jonathan kamaguwangan sa upat niya ka mga anak ug maoy bread winner sa ilang pamilya sanglit maoy nagasto sa iyang mga igsuon sa pagpatungha ug hangtud karon wala pa siya hingpit nakadawat sa nahitabo sa anak.

Usa ka Santos nga Misa ang gipahigayon kagahapon sa buntag ni Msgr. Joselito Tajanlangit diha sa terminal sa Sulpicio Lines sa Pier 5 ning dakbayan.

Ang mga patay’ng lawas gibendisyonan ni Msgr. Tajanlangit sa dihang gisulod na sa mobile morgue sud sa CIP nga giduyogan sa Police Regional Office-7 Band nga mibutang sa Bandila sa Pilipinas sa half-mast isip pagrespeto sa mga biktima.

Matud pa ni Bautista miabot na sa 513 ka mga patay’ng lawas ang miabot na dinhi sa Sugbu ug 88 niini hangtod karon wala pa maila, walo kanila dili mga pasahero sa Princess of the Stars.

Gitataw ni Bautista sa unang niabot nga 306 ka mga patay’ng lawas 209 niini nailhan nila pinaagi sa DNA, samtang 40 ang nailhan sa physical appearance ug upat ang nailhan pinaagi sa dental records.

Gitinguha sa DVI-NBI team nga sa dili pa moabot ang kapaskuhan mahibalik na sa hingpit ang mga bukog sa pasahero ug crew ngadto sa tagsa-tagsa ka kabanay aron magmalipayon sila.

Hinuon ang mga eksperto sa DNA testing nga sila ni Nimal Mahagamage sa International Commission for Missing Persons mipadayag nga dali ra kanila ang pag-ila sa mga biktima bisan pa kung kini bukog na gumikan sa ilang mga kahimanan didto sa Sarajevo.

Ang NBI-DVI maoy mokuha sa mga DNA samples gikan sa mga direktang pamilya sa biktima ug gamiton sa cross-matching ante mortem sample gikan sa mga patay ug kun may motakdo ipahibalo kini dayon ngadto sa mga kabanay ug ipublikar sa media. – BANAT NEWS