Disco sa Lapulapu gisuspenso

CEBU - Temporaryong gisuspenso sa kapolisan sa dakbayan sa Lapulapu ang pagluwat og permiso alang sa mga kalingawan sa disco sa mga sitio ug barangay sa maong dakbayan.

Matud pa ni Lapulapu City Police Office OIC Director P/Supt. Mariano Natu-el Jr. nga kini naggumikan sa misulbong nga krimen sa mga diskohan sa mga sitio ug barangay sa maong dakbayan.

 Ang city hall dili na moluwat og permit sa mga giplanong disco sa usa ka sitio o barangay kung walay rekomendasyon gikan sa kapolisan sa dakbayan sa Lapulapu.

Apan gipasabot ni Natu-el nga siya morekomendar lamang nga paisyuhan og permit ang disco atol sa kasaulogan sa piyesta o bisperas niini.

Mipahimangno usab si Supt. Natu-el nga kutob lang gyud sa alas 12:00 sa tungang gabii ang disco ug iniglapas sa maong oras kinahanglang pakgangon na kini.

Ang pagkontrolar sa mga kalingawang disco may dakong ikatabang sa pagsulbad sa mga kasong naglambigit sa mga batan-on kinsa anha mopagawas og arte sa mga diskohan ilabi na niadtong mga miyembro sa fraternity.

 Samtang gidayeg usab ni Lapulapu City ABC President Leo Mercado ang maong kalamboan ug miawhag sa tanang kapitan sa barangay nga likayan ang pagpatuyang og luwat og permiso gawas lamang kun may rekomendasyon gikan sa kapolisan.

Kahinumduman nga si Lapulapu City Vice Mayor Dr. Mario Amores mipadayag og kabalaka sa misulbong nga mga krimen nga sagad maglambigit sa mga batan-on sa panahon nga adunay disco. – BANAT NEWS