CCPO papangandamon alang sa X'mas season

CEBU - Nagplano si Cebu City Acting Mayor Michael Rama nga makigpulong sa kapulisan sa dakbayan sa mosunod nga mga adlaw aron subling pahinumduman sa ilang katungdanan ug responsibilidad ilabi na nga nagkaduol na ang Christmas season.

Napanglantawan nang daan ni Rama nga mosaka ang kriminalidad niining panahuna partikular na sa mga dapit nga giila nga traditional crime hotspots.

Kini sama sa mga shopping mall, bus terminal, ingon man diha sa pantalan ug sa uban pang mga crime prone areas.

“Naa man gyud nang tendency nga musaka kung dili ta mangandam, kung ang buhaton sa polis day to day lang, problema gyud,” sumala ni Rama.

Tungod niini gusto sa acting mayor nga mapaminaw ang iyang mensahe dili lang sa mga station commander kun dili sa kadaghanan sa kapulisan sa dakbayan.

“I’ll ask sa formation sa mga polis then I will have a short talk nila aron nga they all be reminded nga we are one specially in the absence sa atong mayor,” nagkanayon si Rama.

Wala pa hinuon masultihi sa acting mayor si Cebu City Police Office (CCPO) Director Senior Superintendent Patrocinio Comendador sa iyang plano.

Apan niingon si Rama nga kini iyang ipadangat ngadto kang Comendador atol sa subli nilang panagtagbo niining semanaha.

Gusto sa acting mayor nga personal niyang ipahinumdum ngadto sa mga polis nga ang alarma nga madawat sa usa ka police station, respondihan sa tanan. – BANAT NEWS