Multicab naaksidente, 11 angol

CEBU - Onse ang naangol upat niini ang nagpabilin pa sa tambalanan human mosarasay ug motakilid ang ilang gisakyang multicab kagahapon sa alas 9:45 sa buntag diha sa may barangay Candagit lungsod sa Sibonga samtang mopadulong unta sa Our Lady of Lindogon Shrine.

Si PO1 Dante Molo sa Sibonga Police Station nga gikahinabi sa Banat News nagkanayon nga nitakilid daplin sa dalan ang puwang multicab nga nagdala sa plaka GWJ-362 nga gimaneho ni Horace Progela, 31, taga Maguikay dakbayan sa Mandaue.

Si PO1 Molo miila sa mga naangol nga silingan ug paryente ra sa driver nga sila si Jerry Dalin, 48; Christina Dalin, 48; Brenda Canoñeo, 41; Lino Canoñeo Jr., 14; Glenda Canoñeo, 10; Rodrigo Flores, 37; Ronie Raby Flores, 4; Lofercio Herosa, 53; Lita Herosa, 51; Charmaine Henogen, 11 ug Marry Jane Pomar, 9.

Matud pa ni PO1 Molo nga ang mga biktima padulong unta sa shrine dihang nawad-an og kontrol ang drayber atol sa pag-overtake niini sa usa ka traysikad.

Ang drayber nangangkong kalit nga miungot ang manobela maong wala na niya kini mabalik sa pwesto hangtud nga natumba ug nahandos ngadto sa 20 ka metros.

Ang mga sakay sa maong multicab nga PUJ type nangapakong sa sulod hinungdan nga nangaangol ug gidali sa mga barangay tanod sa nahisgutang lugar sa pagdala sa Carcar District Hospital.

Si Marivic Candelario, duty nurse sa nahisgutang tambalanan nga nahinabi sa Banat News miingon nga upat ang ilang gi-refer sa Vicente Sotto Medical Center tungod kay seryoso ang nahiaguman nilang kadaut sa lawas samtang ang uban gipapauli ug nipadayon sa ilang pagpanagkot sa monghi.

Ang upat nga gidala sa VSMMC mao sila si Pomar ug Flores tungod sa gimulong kasakit sa ulo; Lofercio Herosa nagmulo usab sa iyang dughan, Dalin dili makabarog. – BANAT NEWS