SWAT sa siyudad di pasul-obon itom ok ni Yayoy

CEBU - Pabor si Cebu City Councilor Raul Alcoseba nga dili na pasul-ubon sa itom nilang uniporme ang mga sakop sa Special Weapons and Tactics (SWAT) sa siyudad sa Sugbu.

Ang nahisgutang popular nga itom nga uniporme sa SWAT teams gi-ban na didto sa kauluhan partikular na sa National Capital Region (NCR) tungod kay ang maong matang sa uniporme giingong gigamit usab sa ubang mga kriminal atol sa pagpanulis ug sa uban niining kalihukan.

Partikular niadtong mga establisamento nga lisod sudlon sa ubang mga tawo gawas sa mga awtoridad nga mopahigayon og inspeksyon.

Sa pagkakaron giingong usa na lang ang uniporme sa tanang polis ubos sa NCR Police Office ug kini mao ang ilang regular blue uniform.

 Matud ni Alcoseba nga kung makatabang sa pagmentinar sa kahusay ug kalinaw sa dakbayan ang maong lakang iya kining suportahan.

Ang konsehal nga maoy vice chairman sa Committee on Public Order and Safety sa City Council nidason nga duna nay mga higayon nga magsul-ob og police uniform ang mga tulisan.

 “Kadaghan nang higayon uy nga dunay mga tulisan nga magpapolis-polis, wala siguro dinhi na sa Cebu pero ato pa nang paabuton, ” sumala ni Alcoseba.

Gani niingon ang konsehal nga kini maoy hinungdan nga ilang gibadlong ang mga asset nga magsul-ob og t-shirt sa Criminal Investigation and Intelligence Bureau (CIIB).

Nasayran hinuon sa Banat News nga padayong gipangsul-ob ang CIIB t-shirts sa mga sakop sa Barangay Intelligence Network (BIN) nga gipabantay diha sa City Hall.

Apan giklaro ni Alcoseba nga mahimong madakop ug mabilanggo kadtong mga sibilyan nga magsul-ob og bisan unsang uniporme sa polis. – BANAT NEWS