Imbestigasyon sa CHR way kapuslanan

CEBU - Wala nay kapuslanan ang pagahimuong imbestigasyon sa Commission on Human Rights (CHR-7) nga naglambigit sa mga motorcycle cops sa siyudad sa Sugbu.

Kini kung ang chairman sa Committee on Public Order and Safety sa City Council nga si Konsehal Augustus Pe Jr., maoy pasultihon.

Mipahigayon og pakisusi ang nahisgutang ahensya human mapatay sa mga sakop sa Cebu City Police Office Task Force Motorsiklo ang tulo ka tawo nga nagsakay usab og motorsiklo.

Buot matino sa CHR-7 kung shootout o rubout ba ang pagpusil-patay sa mga biktima nga sila si Abran Gabato, Wilner Ponce ug Totong Cabajar.

Apan mas gihatagan og gibug-aton ni Konsehal Pe ang pamahayag sa kapulisan nga miuna og pabuto sa ilang armas ang mga biktima ug igo lang mibawos ang mga otoridad.

Gani ang konsehal maoy mirikomendar nga hatagan og P150 mil nga cash reward sa siyudad ang mga motorcycle cops nga nakapatay sa mga biktima.

Gawas niini gipahibawo usab ni Pe nga siya mopalabang og resulosyon sa City Council sunod semana nga maghatag og commendation sa mga polis.

Tumong sa konsehal niini nga madasig pa ang kapolisan sa ilang katungdanan pagmintinar sa kahusay ug kalinaw sa dakbayan.

Una nang giinsister sa mga opisyal sa Cebu City Police Office nga lihitimo ang operasyon nga gihimo sa ilang mga sakop niadtong miaging Domingo.

Wala hinuoy mobabag sa CHR-7 kung kini mopadayon pagpahigayon sa ilang nasugdan nga imbestigasyon labot sa maong hitabo.

Apan nasayran nga naglisod ang maong ahensya sa gihimong pakisusi niini tungod usab sa kakuwang sa mga saksi nga ilang makuhaan og mga pamahayag. – BANAT NEWS