Dangerous Drugs Board may hotline

CEBU - Malampusong gilusad sa Dangerous Drugs Board (DDB) ang ilang Hotline alang sa programa batok sa ginadiling drugas sa tinguha nga molampos ang Drug Free Philippines 2010.

Ang kalihokan sa paglusad niini gipangunahan mismo ni DDB Undersecretary Atty. Clarence Paul Oaminal uban sa hepe sa Police Regional Police Office (PRO)-7 Supt. Ronald Roderos niadtong Biyernes sa hapon didto sa Camp Sergio Osmeña Sr. sa Osmeña Boulevard ning dakbayan.

Matud pa ni Undersecretary Oaminal nga pinaagi ning pagbaton og hotline sa DDB sayon nalang alang sa publiko ang pagbutyag ngadto sa taga DDB kung may mapanid-an silang mga tawo nga nagpalusot og illegal nga drugas ug ubang pang kalihokan nga susama niini.

Kini pinaagi sa pag-text lang sa ilang reklamo o kaha report pinaagi sa pag-type sa DDB<Space>HOTLINE<Space> Message ug i-send ngadto na sa 2278 sa Globe ug TM Subscribers.

Matud pa ni Oaminal nga kun madawat na nila ang maong text dihadiha may moabot dayon nga mga tinugyanan sa Philippine Drug Enforcement Agency (PDEA) sa maong lugar aron rondahon o dakpon ang mga hingtungdan sama sa drug pusher o kaha ang mga nag pot-session.

Si Undersecretary Oaminal nagkanayon nga pinaagi niini mapalig-on pag-ayo sa DDB ang ilang kampanya batok sa ginadiling drugas kay dali ug paspas na kaayo ang pagdawat nila sa mga impormasyon.

Dugang pa niya nga angayang magpakabana na ang publiko sa pag-abag sa mga law enforcer sa pagsumpo sa ginadiling drugas kinsa naghulga sa komunidad.

Kini tungod kay responsibilidad sa tanang Pilipino ang pagpakabana batok sa illegal nga drugas ug gikinahanglan mobarog ang katawhan ug makiggubat batok sa mga tigpayuhot niini.

Samtang sa bahin ni Roderos, higpit niyang gidid-an ang publiko sa pagbutyag sa ilang ngalan diha sa ilang text ngadto sa DDB aron dili sila mabalaka nga dumtan sa mga madakpan nga mga tigpasiugda sa kalihokan sa ilegal nga drugas. – BANAT NEWS