CEBU - Gipaabot nga masugdan na karong umaabot Disyembre 1 ang pagpahigayon sa continuing registration alang sa 2010 elections sumala pa ni Cebu City North District Election Officer Atty. Marchel Sarno base sa draft resolution sa Comelec.
Matud ni Sarno nga posibleng kadto na maoy iduso ug aprubahan sa Comelec en banc alang sa pagpagawas og kamanduan.
Niingon ang election officer nga nalatid usab sa draft resolution nga dunay ipahigayon nga registration sa adlaw nga Sabado sa pipila ka mga barangay.
Tumong niini nga marehistro ang tanang botante sa nasod ilabi na kadtong mag-edad og 18 anyos atol unya sa adlaw sa piniliay.
Gitataw sa election officer nga andam na ang duha ka buhatan sa Comelec sa siyudad alang sa gipaabot nga continuing registration.
Gani niingon si Sarno nga kung karong adlawa ipahigayon ang pagpangrehistro, sila makahimo na pagpanawat og mga rehistro.
“Pero magpaabot lang ta sa mando sa atong uluhang buhatan, andam na mi diri duna na tay mga kahimanan og mga forms,” dugang pamahayag ni Sarno. – BANAT NEWS