CEBU - Gireklamo sa usa ka 10-anyos nga tinun-ang babaye ang usa ka magtutudlo sa Binabag Elementary School sa barangay Binabag siyudad sa Bogo tungod sa giingong pagparok niini sa iyang ulo ngadto sa blackboard.
Gawas sa pagparok gikatahong gibunalan pa og stick tungod lang kay wala kini makatubag sa pangutana atol sa ilang klase sa math subject niadtong Miyerkules sa petsa 25 niadtong nilabay’ng bulan sa Oktobre sa alas 2:30 sa hapon.
Ang tinun-an nga taga lungsod sa Tabogon gikuyugan sa iyang 31-anyos nga iyaan pagsumbong sa pagpangabuso ngadto sa Bogo Police Station niana nang Biyernes sa alas 10:00 sa buntag.
Ang gireklamong maestra (ngan gipugngan lang una sa Banat News), math subject teacher sa maong tunghaan.
Matud pa ni PO1 Flores Velasquez sa Womens Desk nga nahinabi sa Banat News nitug-an ang bata nga giparok sa maong maestra ang iyang ulo sa blackboard tungod kay nasuko kining wala siya makatubag sa ilang leksyon ug pagkahuman gibunalan pa siya og stick niini.
Ang iyaan sa bata mitug-an sa kapolisan nga nalangay sila pagpa-blotter sa maong hitabo gumikan kay niadto pa lang Domingo nitug-an nila ang bata sa gihimo sa ilang maestra.
Dugang pa sa iyaan gireklamo na usab nila ang maong magtutudlo ngadto sa principal sa maong tunghaan ug nagpaabot nalang silang ipatawag aron magka-atubang sunod semana.
Matud sa iyaan nga plano usab niya uban sa lain pang mga ginikanan nga moduso og pormal nga reklamo batok sa maong magtutudlo sa Department of Education (DepED) aron mabalhin kini og laing eskwelahan.
Dugang pasangil sa iyaan nga ang maong magtutudlo maoy gihulagway sa mga tinun-an nga labing maldita ug daghan na kanila ang nangahadlok ug buot nalang mobalhin og laing tunghaan tungod kay nahadlok sila sa batasan niini sa klase.
Hinuon si PO1 Velasquez nitambag sa maong tinun-an nga kun masubli ang maong hitabo gikinahanglan nga mo-report kini dayon sa ilang buhatan aron makuhaan kini og medical certificate nga magamit unya pagpasaka og kaso batok sa magtutudlo. – BANAT NEWS