Kamatayon sa Nurse may 'foul play'

CEBU - Kaso sa kamatayon sa usa ka nurse sa Medillen wala pa hingpit sirad-i sa kapolisan tungod kay di ordinaryong aksidente sa dalan ang nahitabo human may nakitang foul-play sa kamatayon niini.

Ang aksidente gikatahong nahitabo sa barangay Lamintak Norte apan matud pa ni SPO3 Mario Remulta, officer-in charge sa Medillen Police dihang nahinabi sa Banat News nagpadayon pa ang ilang gihimong imbestigasyon pagtino sa tinuoray’ng hinungdan sa pagkamatay ni Fredirik Lobetaña nga nurse sa Bogo-Medillen Medical Center ug anak ni SPO3 Elvie Lobetaña nga nadestino sa Bogo City Police.

Sa report sa kapolisan gikatahong misampak kini sa pinutol nga lubi nga nakaingon sa hinanali niini kamatayon apan nasayran nga di aksidente ang nahitabo kundili gipatay kini pinaagi sa pagbunal-bunal kaniya.

Si SPO3 Remulta nga wala magpasabot nga sirado na ang ilang imbestigasyon dihang naduso na sa iyang mga sakop ang spot report nga naghulagway nga traffic accident ang gikamatyan ni Lobetaña sanglit duna pay progress report nga mosunod niini.

Gipasalig ni SPO3 Remulta nga ilang makumpleto sulod niining semanaha ang ilang imbestigasyon pag-establisar sa foul play sa kamatayon niini ug nakig-alayon na sila sa kabanay sa namatay.

Miangkon si SPO3 Remulta nga gibase lang sa iyang mga sakop ang ilang gihimong report sa pamahayag sa mga tawong diha sa lugar ug maoy midala sa biktima sa tambalanan.

Apan si SPO3 Lobetaña amahan sa biktima dihang nahinabi sa Banat News nga wala nay kapuslanan pa ang imbestigasyon sa Medillen Police tungod kay napasaka na sa korte sa iyang abogadong si Atty. Ramsey Quijano ang kaso batok sa walo ngadto sa 10 ka mga suspek nga maoy ni-atang ug nitabang og bunal ug kulata sa iyang anak.

Miklaro hinuon si Lobetaña nga dili siya mohinayon pagpasaka og kaso batuk sa maong mga polis tungod sa kaluoy sa mga kauban. – BANAT NEWS