BOC way labot sa gihimulbolang 'hotcars'

CEBU - Bureau of Customs sa Sugbu walay kalambigitan sa nahitabong paghimulbol sa mga luhong sakyanan nga nakumpiskar sa mga sakop sa Presidential Anti-Smuggling Group kon PASG-7.

Matud pa ni BOC Cebu District Office Chief of Staff Necomedic “Dick” Cariño atol sa pakighinabi sa Banat News wala sila’y legal personality pagkuwestiyon sa mga sakop sa PASG 7 sa nahitabong pagkahanaw sa mga kahimanan sa mga luhong sakyanan nga ilang gikumpiskar.

 Maong walay kalabutan ang BOC sa maong isyu gumikan kay ang PASG maoy nironda, nisakmit ug nipasaka og kaso batok sa tag-iya sa 18 ka mga luhong sakyanan nga walay koordinasyon sa ilang buhatan, wala usab kini i-turn-over sa PASG kanila.

Kahinumduman nga niadtong bulan sa Abril ning tuiga 18 ka mga luhong sakyanan ang gironda sa mga sakop sa PASG uban sa Regional Intelligence Office sa dakbayan sa Mandaue sulod sa yarda sa Song Pa Motors.

Si Cebu City RTC Branch 9 Judge Geraldine Faith Econg mipahigayon og site inspection sa buhatan sa PASG sa CIP ug nadiskubrehang gihimulbulan na ang maong mga sakyanan.

 Nakita ni Judge Econg nga wala nay mga car stereo, ligid ug ang mga windshields nangabuak na hinungdan nga adunay tulobagon ang PASG niini apan walay bisan usa ang midawat sa maong kamanduan. – BANAT NEWS