Negosyante nakuhaan mga armas, airsoft

CEBU - Usa ka negosyante nagtingkagol karon sa karsel sa Criminal Investigation and Detection Group (CIDG-7) human nakuhaan og ubay-ubay nga armas ug bala nga walay mga lisensiya apil ang mga airsoft guns dihang gi-ronda ang panimalay niini mga alas 6 sa buntag kagahapon diha sa Sitio Kalubihan, barangay Talamban ning dakbayan.

Ang gibalhog giila nga si Noel Remedio alias Titing, 32, minyo negosyante, nagpuyo sa nahisgutang lugar human nadakpan nila ni Chief Insp. Rogarth Campo ug mga kaubanan.

Ang grupo nila ni Chief Insp. Campo, armado sa search warrant nga giisyu ni Judge Geraldine Faith Econg sa Regional Trial Court branch 9 nga gipetsahan og Nobiyembre 5 ning buwana.

Nakuha sa panimalay sa negosyanteng si Remedio mao ang usa ka .45, tulo ka 12 magazine nga puno sa bala, usa ka gauge shotgun, usa ka .380 pistol ug gatusan ka nagkadaiyang klase sa armas ingon man kabhang, nakuhaan usab kini og tulo ka airsoft M16 rifle, duha ka airgun rifle mga bala ug magazine niini, ug usa ka MP5 airsoft rifle.

Si Remedio sa dihang gipangitaan og mga papeles niini napakyas sa pagpakitag mga igong dokumento, hinungdan nga pasakaan kinig kasong kalapasan sa RA. 8294 kon illegal possession of firearms.

Ang hepe sa CIDG-7 Sr. Supt. Guillermo Eleazar mipadayag nga nakadawat sila’g impormasyon nga ang negosyanteng si Remedio kanunay mopakita sa iyang mga armas ingon man mopabuto niini. Hinungdan nga mikuha sila’g search warrant batok niini ug positibo ang resulta sa pagkasikop sa maong negosyante.

Ang negosyanteng si Remedio miatubang sa mga sakop sa media nagkanayon nga gisuyaan lang siya sa iyang silingan nga iyang gikaaway niadtong bulan sa Septiyembre human usab iyang gipasirhan ang agianan sa pag-agas sa tubig niini nga miresulta sa ilang panagbangi ug nagkaabot sa barangay. Gibutyag niini nga ang iyang .45 ug ubang armas gi-proseso pa ang mga papeles niini samtang naghupot usab siya’g airsoft gumikan kay miyembro usab siya sa club niini.