Kawani sa Mandaue magtangkil og ID
CEBU - Gihigpitan ni Mayor Jonas Cortes ang pagpatangkil og identification card (ID) sa tanang mga kawani sa city hall sa dakbayan sa Mandaue matag tambong niini sa trabaho.
Sa samang higayon gipatuman usab niya ang pagpakuha og pass slip sa matag higayon nga mogawas ang kawani sa ilang buhatan sa mga oras sa ilang trabaho.
Gipasabot ni Mayor Cortes nga ang iyang kamandoan gitumong sa pagsiguro nga nalakip sa opisyal nga oras sa ilang trabaho ang ilang paggawas sa trabahoan.
Sa memorandum nga iyang giluwatan gimandoan niya ang tanang department head sa nagkadaiyang buhatan sa kagamhanan sa maong dakbayan sa pag-monitor sa tanang mga kawani sa lokal nga kagamhanan sa maong dakbayan.
Higpit niyang gibaod ngadto sa mga department sa pagsumitir gilayon og taho ngadto sa iyang buhatan kutob sa mga kawani nga mapakyas sa pagtuman sa maong kamandoan. – BANAT NEWS
- Latest
- Trending
