CEBU - Gipusil patay samtang nahinanok sa pagkatulog sulod sa ilang balay ang usa ka 17 anyos nga lalaki nga anak og negosyante og mga hayopan didto sa bukirang bahin sa barangay Tubod, lungsod sa San Fernando niadtong Lunes sa alas 11 sa gabii.
Ang biktima mao si Joselito Cortes Jr. anak sa usa ka negosyante og mga hayopan sa maong lugar nga si Joselito Cortes Sr., nagpuyo sa maong dapit.
Matud ni PO3 Antonio Albite sa San Fernando Police Station sa dihang nahinabi sa Banat News, subay sa blotter nga gibasehan niini ang biktima kauban sa iyang tulo ka mga ig-agaw nga sila si Felix, Victor ug Helito Obial nga misuroy kini sa sayo pang gabii sa Sitio Lomboy nga duna lay usa ka kilometro ang gilay-on.
Apan namauli kini nianang pagka alas 9:50 sa gabii ug didto matulog ang biktima nga nag-inusara lang sa karaan nilang balay nga distansya lang og 50 metros gikan sa bag-o nilang pinuy-anan.
Gibutyag sa inahan sa biktima nga si Mercedez, atol sa pagsukit-sukit sa kapolisan nga nakadungog siya og duha ka sunod-sunod nga boto sa armas nianang pagka alas 11 sa gabii apan wala lang niya kini panumbalinga ug mipadayon siya sa pagkatulog.
Apan nianang pagka alas 6 sa buntag dihang gipukaw unta niini ang biktima nga natulog sa ilang karaang balay aron unta sila mosayo pagtumod og mga hayop sa tabo nga ipahigayon sa barangay Sangi mao na lay ilang nakita nga patay na ang biktima.
Dihang ila kining gisuwayan og kaling didto pa nila makita nga duna kini dugo sa ulo ug samad pinusilan sa luyong bahin sa ulo niini nga maoy gituohang hinungdan sa kamatayon.
Gisalikway hinuon sa kapolisan ang posibilidad nga pagpanulis ang motibo sa krimen sanglit diha pa ang kwarta nga P500 sa iyang pitaka ingon man wala sab hilabti ang silver gold nga kwentas niini.
Ang kapolisan padayon pang nag-imbestigar sa maong panghitabo. – BANAT NEWS