CEBU - Gihangop ni Cebu City North District Election Officer Attorney Marchel Sarno ang nakab-ot ug bag-ong ipagawas nga desisyon sa Korte Suprema.
Ang labaw’ng hukmanan mihukom nga “unconstitutional” ang probisyon sa Comprehensive Dangerous Drugs Act nga naghimong rekisito sa drug test niadtong magpapili sa eleksyon.
Nasayran nga si Senador Aquilino Pimentel Jr. maoy mipitesyon ngadto sa Korte Suprema niadtong tuig 2003 batok sa mandatory drug test.
Kini tungod kay alang sa senador wala malakip sa batakang balaud sa nasud ang drug test isip usa sa mga rekisitos niadtong magpapili sa bisan unsang posisyon.
Ang Konstitusyon giingong naglatid lang sa citizenship, voter registration, literacy, age, ug residency requirements sa usa ka kandidato nga kwalipikadong magpapili.
Gidasunan sa labaw’ng hukmanan ang argumento ni Pimentel tungod kay ang usa ka balaud o administrative rule kun mahasupak sa Konstitusyon, kini giingong “null and void” ug walay epekto.
Apan matud ni Sarno nga bisan kun gideklarar pa sa Korte Suprema nga constitutional ang maong balaud kini giingong wala gihapoy kapuslanan.
Kini tungod usab kay walay silot o multa nga ipahamtang niadtong mga kandidato nga mapakyas pagpaubos o pagsumiter og resulta sa drug test.
“Dili gyud reasonable tong balaura kay wa man guy penalty, unsa ra gud to nga ipa-publish ra man ang walay drug test, asa may ngipon ana,” sumala ni Sarno.
Gawas niini miingon ang election officer nga walay kandidatong drug user usab nga anaa sa maayong panghuna-huna ang magpa-drug test kung kini nigamit og drugas.
Nasayran nga dunay mga kandidato sa dakbayan sa nakalabay nga local elections ang wala pa makasumiter og drug test result hangtod karon.
“Wa gyu’y ngipon tong balaura, gadugang-dugang lang to og gasto sa mga kandidato maayo na lang nga gideklarar to nga unconstitutional,” dugang pamahayag ni Sarno. – BANAT NEWS