Nurse gitipi giingong naaksidente lang

CEBU - Natribukar nga dakong sayop ang spot report sa kapolisan sa lungsod sa Medillen may labot sa gihulagway niini nga usa lang ka traffic accident ang gikamatyan sa 22, anyos nga nurse sa Bogo Medillen Medical Center nga giingong nalimbuwad ang gisakyan nga motorsiklo niini ug maoy hinungdan sa iyang kamatayon didto sa barangay Lamintak, Norte.

Gumikan niini, namilegrong mag-atubang og kasong administratiba ang kapolisan sa Medillen tungod sa maong sayop nga spot report nga maoy hinungdan nga wala masikop ug nagpabiling gawasnon ang mga suspek.

Kini human mogawas ang autopsy report ni Dr. Nestor Satur sa PNP Crime Lab sa Police Regional Office Seven (PRO-7) nga nagpakita nga dunay daghang bun-og ug samad sa iyang ulo ug kalawasan ang biktima nga si Ermigiel Fredirick Lobetaña agi sa binunalan sa tubo o ba kaha gahi nga kahoy.

Gibutyag ni SPO3 Elvie Lobetaña, nadestino sa Bogo City Police Station, nagpuyo sa Poblacion San Remegio Cebu ug maoy amahan sa biktima sa dihang nahinabi sa Banat News nadiskubrihan usab atol sa iyang gipahigayon nga linaing imbestigasyon kauban sa iyang suod nga higala ug paryente nga si Atty. Ramsey Quijano nga giatngan sa walo ngadto sa pulo ka suspek ang biktima ug gitabangan kini og kulata ug bunal.

Gibutyag ni SPO3 Lobetaña nga dili mominus duha ka mga saksi ang personal nga niadto sa ilang balay ug maoy mipahibalo nila nga dili tinuod nga nadisgrasya ang iyang anak tungod kay nakakita sila nga gi-atngan kini sa mga estambay sa maong lugar ug gipahunong pag-agi ug sa paghunong gitabangan og kulata ug bunal hangtud nga namatay.

Matud ni SPO3 Lobetaña nga sa dihang napahibalo siya sa pagkahitabo niadtong alas 12:30 sa kaadlawon sa Oktobre 25 nagduda na siya nga duna gyu’y foul play ang kamatayon sa iyang anak human niya makita ang iyang anak nga gidala na sa Verallo District Hospital sa siyudad sa Bogo niadtong tungora nga dunay lungag nga samad sa ulo ug daghang mga bun-og sa lawas.

Kini maoy hinungdan nga mideretso siya sa crime scene ug pag-abot niya didto misamot ang iyang pagduda human nakita niya nga walay bisan gamay’ng kadaut ang motor ug wala say lama sa karsada nga inagian sa disgrasya.

Gipadayag usab ni SPO3 Lobetaña nga duna pay dili mominus laing duha pa ka susamang panghitabo sa mao gihapong lugar nga gihimoan usab dayon og spot report nga traffic accident lang sa kapolisan sa Medillen bisan og dunay foul play niini apan wala lang kini modaku tungod kay wala usab mopakita og interes ang mga kabanay sa maong mga biktima.

Samtang si SPO3 Proniely Artesuela, deputy chief sa Medillen Police Station sa dihang nahinabi sa Banat News daling mipasa ngadto sa iyang kauban nga si PO3 Paquito Son tungod kay mao kini mirespondi atol sa hitabo.

Hinuon gibutyag ni PO3 Son nga dili tinuod nga wala sila mohimo dayun og aksyon atol sa hitabo tungod kay mirespondi dayon siya pagkadawat sa maong report ug gani nagpahigayon siya og imbestigasyon.

Apan matud niya pag-abot niya sa crime scene bugtong ang motor nalang ang nahabilin ug ang biktima gidala na sa tambalanan hinungdan nga nagpakisayod sila sa mga tawo nga nakasaksi sa panghitabo.

Matud ni PO3 Son nga dunay usa ka lalaki nga iyang gikahinabi nga mibutyag nga naigo ang biktima sa pinutol nga lubi ug nalimbuwad. “Ang estorya nila didto naigo sa lubi, unya pagtan-aw nako sa lubi duna may pawot,” dugang asoy ni PO3 Son.

Matud niya nga wala gyud silay kalibutan sa maong panghitabo ug nag-agad lang sila sa pamahayag sa mga tawo nga ilang gisukit-sukit nga nakasaksi sa hitabo.

Gihimakak hinuon ni PO3 Son ang pasangil nga duna pay laing duha ka aksidente sa maong lugar nga bisan og dunay foul play gikonsiderar lang kining traffic accident paghimo sa spot report nga gipadala sa CPPO.

Nakahipos og report ang Banat News nga grabe ang problema sa gidiling drugas sa barangay Lamintak Norte ug gani dunay mga estambay sa maong lugar ang mangatang sa mga manglabay ug manghingi og kuwarta.

Hinuon gitugyan na lang ni SPO3 Lobetaña ngadto sa iyang higala nga abogado ingon man sa Kahitas-an ang pagpasaka og kaso sa mga suspek nga nagdumili lang una siya pagtug-an sa mga pangalan niini aron dili makabantay ug mosibat na hinuon.

Wala kalikayi ni SPO3 Lobetaña ang iyang gamay’ng kasagmuyo sa kapulisan sa Medillen tungod kay gumikan sa spot report niini nga naghulagway nga usa lang ka traffic accident ang maong panghitabo wala na hinuon mapahigayun ang hot pursuit operation aron unta masikop ug makostudiya sa kapolisan ang mga suspek pending sa paghimo og dugang pakisusi ngadto na sa pagpasaka og tukmang kaso sa korte.

Samtang gitun-an usab karon ni Atty. Quijano ang pagpasaka og kasong administratiba batok sa mga polis sa Medillen nga responsable sa pagduso og sayop nga spot report didto sa CPPO nga gihulagway niya nga nagtinapulan paghimo og initial investigation aron mahibaw-an ang matuod nga panghitabo. – BANAT NEWS