Gipusil sa polis sa Danao patay

CEBU - Namatay gyud ang usa sa duha ka mga armadong lalaki sulod sa tambalanan nga napusilan sa usa ka polis atol sa pinusilay sulod sa sam-ang sa barangay Taytay siyudad sa Danao niadtong Domingo sa kaadlawon.

Ang biktima nga nakabsan sa iyang kinabuhi mao si Junrel Bentoy, 19, taga Tabok Kamalig Bato sakop sa maong siyudad.

Samtang ang laing biktima nga si Marc Juda Ramonida,24, pag-umangkon ni SPO4 Ramerito Ramonida sa Danao City Police Station nagpaalim pa sa tambalanan sa iyang samad pinusilan sa tuong bahin sa iyang lawas.

Matud ni PO1 Marlon Remollo sa Danao City Police dihang nahinabi sa Banat News gisusi sa ilang mga kauban pinangulohan ni SPO2 Ramir Oliverio ang pinuy-anan ni Bentoy alas 3:25 niadtong Lunes sa hapon apan mao nalay ilang nahibaw-an gikan sa pamilya niini nga namatay na ang biktima.

Gimanduan na sa hepe sa kapolisan sa Probinsya sa Sugbu Sr. Supt. Carmelo Valmoria si Supt. Romeo Perigo nga maoy mangulo sa pag-imbestigar ni PO3 Rochelle Arquiza nadestino sa Regional Intelligence Office sa PRO-7 apan lumad nga taga Guinsay siyudad sa Danao.

Si PO3 Arquiza nanagkot sa sementeryo niadtong higayuna dihang nagpatabang niya ang mga tanod tungod sa armadong mga batan-on nga nisukol dihang gidakop hinungdan nga iya kining giduol apan imbes motahod   gikatahong mibunot hinuon og armas hinungdan nga sila nangapusilan ug nalandig sa tambalanan. – BANAT NEWS