CEBU - Patay nang nadangat sa tambalanan ang usa ka lalaki nga kaslonon karon untang sunod bulan human maliki ang ulo niini sa dihang midasmag ang motorsiklo niining gisakyan sa iyang gikasugat nga sakyanan didto sa Sitio Lusimba,Poblacion-3 lungsod sa Minglanilla niadtong Lunes sa alas 8 sa gabii.
Ang biktima mao si Lemuel Meiliang, 20, ulitawo, apan kaslonon na unta karong sunod bulan sa iyang hinigugma nga taga Leyte apan wala pa makuha ang pangalan, nagpuyo sa barangay Beto, Minglanilla ug nagtrabaho isip construction worker.
Samtang ang drayber sa gikabangga niining Nissan Vanette mao si Lovler Barin-an, hingkod ang panuigon ug nagpuyo sa Poblacion Ward-4 sa maong lungsod.
Matud ni SPO1 Florante Capangpangan, traffic investigator sa Minglanillla Police Station sa dihang nahinabi sa Banat News gikan sa barangay Beto ang motorsiklo nga Kawasaki kolor itom nga gimaneho sa biktima ug paingon unta kini sa lungsod.
Samtang ang Nissan Vannete gikan kini sa lungsod ug paingon untang motungas sa ibabaw nga bahin apan paghiabot nila sa luyo nga bahin sa simbahan sa lungsod aksidenting nagkabangga ang motorsiklo ug ang sakyanan.
Matud sa mga nakasaksi sa hitabo subay sa gihimong pagsukit-sukit sa kapolisan kusog nga nagpadagan sa motorsiklo ang biktima ug samtang ang gikasugat niining sakyanan nag-signal na kining daan.
Maayong pagkasungag sa motorsiklo ug sakyanan nga miresulta sa pagkapasok sa ilawom sa sakyanan sa motorsiklo samtang nabanda sa bumper sa sakyanan ang biktima una pa kini malabay sa karsada.
Daling gitabang ang biktima ug gidala sa Minglanilla District Hospital apan gideklarar kini sa mga doktor nga dead on arrival (DOA) human makaangkon og grabeng kadaot sa iyang ulo nga miresulta sa pag-agas sa dugo sa iyang dunggan ug ilong. – BANAT NEWS