Bonbon giduso para sa DAR program

CEBU - Giduso na sa konseho sa dakbayan sa Sugbu ang barangay Bonbon ning siyudad   isip Special Agrarian Reform Community pahaom sa konseho sa rekomendasyon gikan sa Cebu Provincial Agrarian Reform Office nga gipadangat diha sa City Council.

Ang chairman sa Committee on Agriculture sa konseho nga si acting vice mayor Hilario Davide III maoy nipalabang sa resolusyon alang niini aron makapahimulos ang mga mag-uuma sa Bonbon sa mga programa sa provincial agrarian office sa mosunod nga mga adlaw.

“Maka-receive na unya ang mga mag-uuma sa maong barangay og general assistance gikan sa provincial agrarian office,” sumala ni Davide.

Partikular na niini ang pagmugna og technical development plan sa mga mag-uuma pagpalambo sa ilang panginabuhian ug sa uban pang tabang nga gikan sa gobiyerno.

Nasayran nga dunay mga mag-uuma diha sa nahisgutang barangay ang nahatagan og mga luna pinaagi sa Comprehensive Agrarian Reform Program (CARP).

Kini maoy gitinguha sa provincial agrarian office nga matabangan ilabi na nga kini giingong nakapasar sa technical criteria sa maong buhatan.

Nagkanayon ang acting mayor nga ila nang pahibaw-on ang nahisgutang buhatan ingon man ang mga opisyal sa barangay Bonbon sa ilang naaprubahan nga resulusyon.

    Matud ni Davide nga posibling duna pay mga bukirang barangay sa dakbayan ang iduso usab isip Special Agrarian Reform Community.

Kini tungod kay ang provincial agrarian office giingong padayon pa nga ni-evaluate sa mga mag-uuma sa ubang kabarangayan sa siyudad.  (BANAT NEWS)