CEBU - Gumikan kay wala na tagda sa iyang mga ginikanan usa ka batan-on ang gituuhang naghikog atol sa pagsaulog sa kalagkalag diha sa Ompad Compound sa barangay Pajac dakbayan sa Lapulapu.
Ang naghikog mao ang usa ka Ritchie Booc, alyas Kano, 22, (dunay ka-live-in) usa ka security guard ug residente sa maong dapit.
Sa imbestigasyon ni PO1 Jumar Ortiz sa Crime Against Person ang kapuyo niining si Lorena Arong nga gikan pa sa trabahoan sa milabay’ng gabii maoy nakakita kaniya nga nagbitay sa pising gihikot sa liog sud sa ilang balay.
Sa paghiling sa kapolisan adunay suicide note nga nakuha sa bulsa niini nga nagkanayon “Una sa tanan dugay ra ko gikapoy sa kinabuhing buhi, pasayloa ko ninyong tanan ug diri ra kutob ang kinabuhi sa usa nga nagmahal kaninyo: Kano.”
Walay nakitang timailhang may foul play ang kamatayon ni Booc, samtang si Arong mibutyag nga walay gitug-ang problema si Booc kaniya ug wala usab sila mag-away atol sa iyang paglakaw padulong sa trabahoan.
Ang mga silingan ni Booc mipadayag nga sa milabay’ng Nobiyembre 1 nakig-inom kanila si Booc ug kini misaysay nga wala na siya tagda sa iyang mga ginikanan ug tungod niini naproblema siya og maayo. (BANAT NEWS)