CEBU - Nayagyag ang tinae sa usa ka tawo human lubaa sa iyang manghod bunga sa intre-pamilyang away didto sa Sitio Bunsay barangay Bolinawan siyudad sa Carcar niadtong Domingo sa ala1:30 sa hapon.
Ang biktima mao si Bernardino Villarta, 47, minyo, nga taga Bunsay samtang ang suspek mao si Oldarico Villarta, 38, minyo nga iya rang manghod.
Si SPO1 Zacarias Cabaluna sa Carcar City Police Station mibutyag sa Banat News nga sa wala pa mahitabo ang pagpanunggab, ang laing manghod sa biktima nga si Josue, giingong hubog kaayo ug nangita og away didto sa balay sa biktima.
Didto magsugod ang panaglalis sa managsuon hangtod nga miinit kini nga naabtan sa suspek.
Apan bisan wala kaayo masinati sa sinugdanan sa panag-away sa iyang maguwang ug sa ilang kamanghoran nga si Josue, midiretso lang kini og laban sa naulahi.
Dihadiha gihansakan dayon sa dala niyang kutsilyo ang iyang maguwang ug nayasyas ang tiyan niini hinungdan nga mibuhagay ang tinae.
Dihang nakita sa suspek nga migawas ang tinae sa iyang maguwang mikaratel kini’g dagan pahilayo sa lugar.
Gidali paghatod ang biktima ngadto sa Carcar District Hospital apan gipalahos kini ngadto sa dakbayan sa Sugbu gumikan sa katalandugon sa kahimtang niini.
Gipangita pa sa kapolisan ang supek hangtod karon.