MCC 'kompleto' na sa rekisitos
CEBU - Nangangkon ang mga opisyales sa nakontrobersyal na kaayong Mandaue City College nga 90 porsiyentong nakakompleto sila sa tanang rekisitos aron maka-offer og kursong BS in Nursing.
Kini base sa gihimong “final evaluation and inspection” sa Commission on Higher Education kon CHED 7 pinaagi sa mga sakop sa Regional Quality Assurance Team nga misusi sa ilang mga kagamitan diha sa MCC building sa Eversly Hospital sa Jagobiao kagahapon sa buntag.
Base sa pamahayag ni CHED Supervisor II Dr. Jucel Ann Jumao-as ilang gisubay pagbalik ang 15 ka mga kakulangan sa MCC nga ilang nakita sa milabay’ng evaluation niadtong Hulyo ug nakakita sila og kalambuan hinungdan nga kini ilang gideklarar nga 90% na nga nakakuha sa standards sa CHED sa pag-offer sa kursong BS in Nursing.
Ang evaluation team gipangulohan ni CNU President Dr. Marcelo Lopez inubanan nila ni ACT College of Nursing Dean Dr. Emilie Bustamante ug UV College of Nursing Dean Dr. Jessie Emphasis ug gitagsa-tagsa pagsusi ang mga kagamitan sa maong kurso lakip na ang mga magtutudlo kung duna bay ensaktong kasinatian sa pagtudlo sa maong kurso.
Nasayran nga halos kumpleto na ang pasilidad sama sa laboratory, hospital equipment ug operating and delivery room facilities sa maong tunghaan.
Gamay nalang usab ang kulang ang mga dokumento sa MCC gawas lamang sa MOA tali sa VSMMC ug uban pang mga tambalanan isip hospital base sa mga tinun-an nga wala pa maaprubahi tungod sa kakulang sa Certificate of Compliance gikan sa CHED base sa resulta sa evaluation sa evaluation team.
Dako ang pagsalig ni MCC President Dr. Paulos Cañete nga maaprubahan sa CHED ang ilang Certificate of Compliance sa dili pa matapos ang tuig 2008.
Nagpasalamat si Cañete sa tabang nga gitunol kanila ni 6th District Rep. Nerissa Soon Ruiz nga mihatag og pundo aron makumpleto ang mga rekisitos ug aron di maundang sa pagtungha ang mga tinun-an. (BANAT NEWS)
- Latest
- Trending
