1 sa napatay sa c'point gang leader

CEBU - Nailhan na ang tulo ka mga tawong luwan og motorsiklo nga napusilan patay sa mga sakop sa Task Force Motorista sa Cebu City Police Office nga nakigpinusilay diha sa checkpoint niadtong Domingo sa hapon sa barangay San Roque ning dakbayan sa Sugbu.

Kagahapon sa buntag ang mga kabanay sa tulo nga napusilan patay nibisita sa Cosmopolitan Nivel Hills sa Lahug ug maoy miila kanila.

Matud pa ni SPO2 Rey Cuyos sa Homicide Section ang mga napatay mao sila si Abran Gabato, 28, taga sitio Sandayong Guadalupe, habal-habal drayber ug maoy nagmaneho niadtong tungora sa Honda nga motorsiklo (GU 1664); Werner Ponce, 31, alyas Botong, taga Kalunasan, ug usa ka Totong Cabajar taga sitio Sandayong sa samang barangay.

Matud ni PO2 Michael Codaste sa Homicide Section ang tulo pulos nahiagum og samad pinusilan sa ilang mga ulo ug kalawasan.

Ang direktor sa CCPO, Sr. Supt. Patrocinio Comendador nagkanayon nga lehitimong checkpoint ang gihimo sa iyang mga sakop niadtong higayuna agi’g pagbantay atol sa kalagkalag.

Base sa report ang usa sa mga backrider ni Abran maoy niuna sa pagpusil sa mga pulis apan walay nangaigo ug diha-diha nibawos ang mga polis hinungdan sa ilang kamatayon.

Si Supt. Pablo Labra II, deputy director for Operation ug pangulo sa TF Motorista maoy nangulo sa maong checkpoint uban ni Sr. Insp. George Ylanan.

Matud ni Ylanan sa dihang nakabantay ang tulo nga dunay nag-checkpoint kalit lang silang gipamusil sa backrider hinungdan nga agig pagpanalipod sa ilang kaugalingon mibalos sila.

Si Abran nag-ungot ang bala sa tuong bahin sa lawas ubos og diyotay sa ilok, samad sa ulo; si Ponce dili mominos unom ka samad, duha sa liog, tuong tampihak, ubos og diyotay sa liog, samtang si Cabajar upat ka samad pinusilan sa ulo ug lawas niini. Ang tulo daling gihatud sa Cebu City Medical Center apan pulos nakabsan sa kinabuhi.

Ang iyaan ni Gabato nga si Cerila nga nahinabi sa mga tigbalita nagkanayon nga niadtong Domingo sa buntag gipugngan nila nga dili pamasaheroon tungod kay naghikay sila sa Kalag-kalag apan niinsister kini nga mobiyahe siya tungod kay niadtong higayona libre ang abangan sa motor.

Gibutyag sa iyaan nga walay record ang iyang pag-umangkon diha sa Guadalupe Police Station gawas lang nga mopalit kini og away sa ilang mga silingan maong nabalhog kini sa detention cell sa Guadalupe Police station.

Ang kapuyo ni Ponce nga si Nimfa Ramirez mitug-an nga napriso sa Cebu City Jail kaniadto iyang kapuyo tungod sa kasong murder ug drugs.

Base sa record ni Sr. Insp. Michael Anthony Bastes, hepe sa Theft and Robbery Section sa CCPO niadtong Enero, 1999 nadakpan niya si Ponce pinasikad sa Warrant of Arrest sa kasong murder ug laing kasong double murder nga giisyu ni kanhi Judge Martin Ocampo sa RTC Branch 7.

Apan giabsuwelto kini ug nakagawas niadtong 2005 apan pagka sunod tuig napriso og balik tungod sa ginadiling drugas ug pagka 2007 nakagawas na usab sa maong bilanggoan.

Niadtong Enero karun lang tuiga napusilan si Ponce diha sa A. Lopez apan naluwas, illegal nga drugas gihapon ang gituohang hinungdan.

Si Bastes kinsa maoy niimbestigar kaniadto sa pagsiaw sa gang nga Phi Omega Gamma Society (POG’S) diha sa Guadalupe nagkanayon nga si Ponce maoy lider niini ug dunay dili mominos 300 kapin nga miyembro gikan sa Guadalupe hangtud na sa siyudad sa Danao.

Ang mga miyembro sa grupo dunay daghang mga kasong naglambigit og homicide, murder, robbery-hold-up, “akyat bahay” ug snatchings tungod kay final test una pa mahimong miyembro niini mao ang paghimo og aktwal nga krimen.  (BANAT NEWS)